Romans 10

Miˈtakhu ta-o khapo hi pammati ay Hesu Kristo

¹ A-akhi, achi anhan hitay pamhod u an miˈtakhu hay hato papadchung u an Hudju, ja hijah tay hini e-arkhaw u an ekalalag ay Apo Jos. ² Achi mehaot an matikhaw an piˈhahalichit cha an munserbi ay Apo Jos muti achi cha ma-awatan hini penhod Apo Jos hi aton cha an munserbi. ³ Ti achi cha penhod an annilaon hini enat Apo Jos ta mipfilang hana tatakhu hi magpong hi pannig na, ja hinujagkhu pa-ennongan cha ja hini pangunuchan cha ay ni urchin Moses ta magpong cha koma. Hotti agkhuy cha inapfulut chin inalin Apo Jos hi aton ta mipfilang ta-o hi magpong. ⁴ Ti, khapo chin enat Kristo, ja napogpog hini punhocholan ta-o hi urchin ta an amin hana mamati ay hija ja chichay mipfilang hi magpong.

⁵ Hitay chin intulaˈ Moses an aton chi takhu an mumpfalin hi magpong khapo hi pangunuchan hi urchin, an

“Hini takhu an mangat an amin hay hato urchin, ja miˈtakhu ay Apo Jos hi ma-id pogpogna.”

⁶ Muti hana tatakhu an nipfilang hi magpong khapo hi pammati na ja meˈ-ampoy cha ay tay impatulaˈ Apo Jos ay Moses an “Achi ta-o allon hi, ‘Ngay nin umuy ad langit?’” An hay podhona an hapiton ja gway umuy ta agwitona hi Kristo an umali an manakhu ay chita-o. ⁷ “Ja achi ta-o khu allon hi, ‘Ngay nin umuy ad Chalom an gwachaan hana nun-atoy?’” An hay podhona an hapiton ja gway umuy ad Chalom an i mangagwit ay Kristo. Achi ta-o allon hitay ti napfalin an immali hi Kristo heto lota an manakhu ay chita-o ja nummahu mahpay. ⁸ Muti chita-o an namati ay Kristo ja hay allon ta-o ja amat chin intulaˈ Moses an inalin Apo Jos hi,

“Agkhuy ni-a-achawwi ay chaˈju hitay tukhun u. Mapfalin ju an nomnomon ja haphapiton.”

Ja hitay itukhun Apo Jos ja mahapor an mamati hana tatakhu ay Kristo, ja hija hini khun mi ekasaba. ⁹ Ti nu tihtikhuwan ju an hi Hesus chi Apo ju ja nehemad hini pammati ju an minahuwan Apo Jos hija, ja miˈtakhu aju. ¹⁰ Ti hini nehemad chi pammati na ja khuna tihtikhuwan, ja ipfilang Apo Jos hi magpong hot miˈtakhu. ¹¹ Ja nitulaˈ ay tay Hapit Apo Jos hi, “An amin chi mamati ay hija ja ma-id chi hay i cha pipfapfa-inan.” ¹² Nidchum an amin chi takhu ay tay, an numpapadchung hana Hudju ja hana Hentil. Ti un na-ohha hini Apo ta-o an amin, ja achi mapogpog hini khohkhoh na an amin hana mumpatolong ay hija. ¹³ Ti hitay hini inalin tay Hapit Apo Jos hi nangarjana hi, “An amin hana mumpfokha hi tolong ay Apo Jos ja takhuwona.”

Ma-id pampfar hana Hudju hi achi cha pamatiyan ay Hesu Kristo

¹⁴ Ma-id aton cha an mumpatolong ay Apo Jos nu agkhuy cha namati ay hija. Ja ma-id aton cha an mamati nu ma-id chengchengngor cha hi omaˈ-atana. Ja ma-id munchongor nu ma-id hay mangaskasaba. ¹⁵ Ja ma-id aton cha an mangaskasaba nu achi honakhon Apo Jos chicha. Muti hay hato Hudju ayya ja ma-id pampfar cha ti gwacha hana hennag Apo Jos an i nuntuchu ay chicha. Ti impitulaˈ Apo Jos hitay an allona hi,

“Mun-an-anla ta-o hana umali an mangkaskasaba hana maphod an impa-innilan Apo Jos.”

¹⁶ Muti un tortollo hana Hudju an namati ay tay Ebanghelyo. An amat chin inalin Isaiah hi nangarjana hi, “Apo Jos, anagkha mah ta ma-id chi hay namati chin intudtuchu mi?” ¹⁷ Hini ayya armugwan chi pammati ja hini khun punchongolan ay ni Hapit Apo Jos. Ja chonglon ta-o hini Hapit Apo Jos khapo hana mangkaskasaba ay ni omaˈ-atan Kristo.

¹⁸ Un chah agkhuy namati hana Hudju khapo ta ma-id chengchengngor cha? Achi amat heto. Ti gwa han impatulaˈ Apo Jos an allona hi,

“Hana khun cha itudtuchu ja nunchongor an amin ay tay lota,

Ja hana inali cha ja nipa-innila an amin hi apfuglapfuglay.”

¹⁹ Hotti chengngor hachi holag Israel muti un chaakay agkhuy na-awatan? Na-awatan cha, ti anong un hachi Hentil ja na-awatan cha. Ja gwa han impatulaˈ Apo Jos ay Moses an inali na hana Hudju hi,

“Omaamoh aju ja pfumungot aju nu tikhan ju hini atoˈ an mangekhohkhohan hana Hentil an ngongohmolon ju, ti allon ju hi ma-id anila cha ay ha-in.”

²⁰ Ja hay hato chi nun-emohag Isaiah an inalin Apo Jos hi,

“Chinaknganaˈ hay hana Hentil an achi khun maningit ay ha-in.

Anong un cha agkhuy nunhanhan nu ngay omaˈ-ataˈ ja numpatikhagwaˈ chamchama ay chicha.”

²¹ Muti hay hato ayya holag Israel ja allon Apo Jos hi, “Akamoh kaykhu an napfajag hi pangchuchuwagwaaˈ ay tay ngamoy u ay chicha, muti unaˈ tugwali ilukhangeh ja pfinuhulaˈ ay chicha.”