6
Natoy ta-o hi pfahor muti miˈtakhu ta-o ay ni pfakhu an piˈtakhuwan
1 Unchani chah ja gway mangali hi, ti nu amat hina ja etortoloy ta-o an khun pfumahor ta omom-omod pay an ekhohkhohan chita-o ay Apo Jos. 2 Achi mapfalin an amat heto. Ti nawaya-an ta-o hi apfalinan chi pfahor an mangchachalan ay chita-o, ja napogpog hini napfahulan an piˈtakhuwan. Hotti anagkha ta i ta-o khu miˈtakhu hi pfahor? 3 Aniˈ-ila ju mit an chin numpabautisaran ta-o ta ma-innila an nidchum ta-o ay Kristo, ja nidchum ta-o khu ay hija an natoy. 4 Hotti hini omaˈ-atan tay numpabautisaran ta-o ja nidchum ta-o ay Kristo an natoy ja nilupfuˈ. Ja nummahu hi Kristo khapo ay ni apfalinan Ama na hotti niˈmahu ta-o khu ta miˈtakhu ta-o ad ugwani ay tay pfakhu an piˈtakhuwan.
5 Nidchum ta-o ay Kristo chin natajana hotti umannung an midchum ta-o khu chin nummahuwana. 6 Anila ta-o an chin nihikhud an atatakhu ta-o ja nidchum an nepfakhat chin kros Kristo ja napogpog chin napfahulan an kinatakhu ta-o, hot achi ta-o mahpay himpfut tay pfahor an nangakhaˈ-utan ay chita-o. 7 Ti hini takhu an natoy ja nawayawaya-an ay ni apfalinan chi pfahor. 8 Nidchum ta-o an ne-etoy ay Kristo hotti mamati ta-o an nidchum ta-o ay ni nahamad an piˈtakhuwana.
9 Anila ta-o an nummahu hi Kristo ja angkhaynana an achi mahpay matmatoy ja ma-id chi apfalinan chi patoy ay hija. 10 Ti chin natajana ja napfalin an enapfak na an amin chi apfalinan chi pfahor. Hotti angkhaynana an achi khahin una ipiggwa an matoy. Ja ad ugwani an nummahu ja gawwa an matattakhu an khun mangat ay ni pa-idaydayawan Apo Jos. 11 Hotti chita-o khu, ja ipfilang ta-o hini achor ta-o an amat hi natoy ti tenaynan ta-o hini pfahor an nangakhaˈ-utan ay chita-o. Ja ad ugwani ja miˈtakhu ta-o an khun mangchat hi dayaw ay Apo Jos khapo hi nidchuman ta-o ay Hesu Kristo. 12 Hitay achor ta-o ja emmengha an khun pfumahor. Muti ad ugwani ja mahapor an achi ju apfuluton an hini pfahor chi mangpadchong ay chaˈju ta aton ju hini napukhit an penhod chi achor. 13 Achi ta-o e-agwat hitay achor ta-o, anong un hay ohah alimatong na, ta atonay napukhit, ta un ta-o gwot e-agwat ay Apo Jos hitay achor ta-o ja an amin hini alimatong na an mangat hi maphod. Ti hitay chi amatan ni takhu an nipfilang hi natoy muti inchatan Apo Jos hi pfakhu hi piˈtakhuwana. 14 Hotti ma-id apfalinan chi pfahor an mangpadchong ay chita-o ti achi ta-o miˈtakhu khapo hi pangunuchan hi urchin muti miˈtakhu ta-o khapo hi khohkhoh Apo Jos.
Nawayawaya-an ta-o hi pfahor
15 Unchani chah ja gway mangali hi, nu amat hina ja etortoloy ta-o an khun pfumahor ti miˈtakhu ta-o ay ni khohkhoh Apo Jos an pfu-un ay ni pangunuchan hi urchin. Achi mapfalin an amat heto. 16 Anilam an hini khun mu unuchon ja hijay nang-inhimpfut ay he-a ta unuchom hini allona. Nu etoloy ta-o an khun pfumahor ja amat ta-o hi himpfut tay pfahor, ja ma-id uchumna hi ipfunga na nu pfu-un hini pundusaan Apo Jos ay chita-o hi ma-id pogpogna. Hay maphod ja ichat ta-o hitay piˈtakhuwan ta-o ay Apo Jos an mangunud ay ni penhod na. Hot ipfunga nay piˈtakhuwan an magpong hi pannig na.
17 Otong chi punyamanaˈ ay Apo Jos an anong un aju himpfut chi pfahor chin hopapna muti ad ugwani ja hinahalichit ju an khun unuchon hana umannung an tudtuchu an nituchu ay chaˈju. 18 Ja nawayawaya-an aju ay ni apfalinan chi pfahor ta ad ugwani ja hini magpong chi mangpadchong ay ni piˈtakhuwan ju. 19 Tan in-arig u hitay omaˈ-atan chi himpfut ja ap-apo ta nalaka hi ma-awatan chi tatakhu, ti achi aju maka-awat hay hato na-unig an khun u ituchu. Ipiggwaˈ an allon hi, chin hopapna ja inapfulut ju an hana napupukhit chi mangpadchong ay ni piˈtakhuwan ju ja emmala aju an mangat hi napukhit. Hotti ad ugwani ja apfuluton ju an hini maphod chi mangpadchong ay ni piˈtakhuwan ju hot khun pompomhod hini magpong an piˈtakhuwan ju ay Apo Jos. 20 Chin hopapna an himpfut aju pay hi pfahor, ja achi mapfalin ay chaˈju hini magpong an piˈtakhuwan. 21 Muti ngay tugwali linagpfu ju an nangat hay hachi pfahor an pfuma-inan ju ad ugwani? Hay adusaan ay Apo Jos chi pumpfanakhana. 22 Muti ad ugwani ja nawayawaya-an aju hi pfahor ja numpfalin aju hi himpfut Apo Jos ta hijay unuchon ju. Hot ipfunga na hini magpong an piˈtakhuwan ju an hay i na pumpfanakhan ja hini piˈtakhuwan ad langit an ma-id chi pogpogna. 23 Hini lagpfun chi napfahulan ja atajan an hija hini i-achawwiyan ta-o ay Apo Jos ja ingkhana. Muti hini khohkhoh Apo Jos hana mamati ay Hesu Kristo ja piˈtakhuwan an ma-id pogpogna.