Gàlátì ŋa 6

Ìnàbí-mi ŋa, bí ó dzɛ́ ní ɔ̀nyà-kã̀ dzàbi, ɛ̀ŋɛ yèé Mímí-Ɔ̀ɖáyé† wà ńǹtá-ŋɛ́ si, tsí wà gbɛ̃́ ŋɛ́#ɛ́, è náa mɔ́wɔ́ gbè fú ɛnɛ nyɛ̀ŋɛ̀ ńnɔ́ tútù, tsí kó sɛ̃̀ wá nɔ́ɔ̀nà gãgã. Ó ɖi, ǹ wà wí fú ŋɛ́ ní bí ìwɔ-kã̀, ò wà mɔ́wɔ́ gbè fúnɛ bɛ́ɛ̀, ó wà ní o tsɔ́ éwo-ara-ɛ̀ɛ, àtsùgbée ìwɔ gbo o máa bɔ́ dzì náàɖã́wò, tsí o dzàbi-Ɔ̀ɖáyé. 2 Ó wà ní e wà mɔ́wɔ́ gbè fú ara-ŋɛ́ ŋa gbo bí ìkparà-kã̀ wà ńǹtá-ɔ̀nyà-kã̀ si. Bí è wà tse bɛ́ɛ̀, è wà tse si ńǹtá-iŋɛ́ yèé ŋa Kírísítò ɖá si fúnɛ ní ká wà tse#ɛ́ dzálɛ̀ ńnɛ̀ɛ́. 3 Ó ɖi, bí ɔ̀nyà-kã̀ wà rí ara‐ɛ̀ ní òŋu dzɛ́ iŋɛ́-kã̀ tã́ná kò sì dzɛ́ iŋɛ́-kã̀ kpókpó#ɛ́, ɛnɛ nyɛ̀ŋɛ̀ wà rú ara‐ɛ̀ ni. 4 Ó wà ní kṹnukṹ kó wà kpa ìlò-ara‐ɛ̀ wò. Tsí bí ò kpaá wò bɛ́ɛ̀, tsí ò rí ní ìlò‐ɛ̀ɛ sã̀, ɛ̀ɖɔ̃̀-ɛ̀ɛ kó dzokó si ti nára-ìlò tìwɔ ká-ɛ̀ɛ sɔ̃́ŋú gé. Ó ɖi, kó máa dzɛ́ ní ò wà mú ìlò-ɛ̀ɛ, tsí wà ń ɖé bá ti olòmírɛ̃̀-kã̀. 5 Ǹ wà fɔ̀ bɛ́ɛ̀, iŋɛ́ yèé tse#ɛ́, iŋɛ́ yèé wà wo odzú-kṹnukṹ#ɛ́ wà fú kṹnukṹ si ni. 6 Ó ɖi, bí ɔ̀nyà-kã̀ wà gba ɛ̀kɔ́ ti nára-afɔ̀-Ɔ̀ɖáyé ńɖi-ɔ̀nyà-kã̀, ɛnɛ nyɛ̀ŋɛ̀ kó wà kpɛ̃́ iŋɛ́‐ɛ̀ ŋa bá ɛnɛ yèé wà tsɛ̀kɔ́#ɛ́ fúu#ɛ́.

7 È máa rú ara-ŋɛ́ gba ɔ̀nà-òmírɛ̃̀. À kà mú Ɔ̀ɖáyé tse. Ó ɖi, iŋɛ́ yèé ɔ̀nyà náa gbɛ̃̀#ɛ́, òŋu ní náa wù#ɛ́. 8 Bí ɔ̀nyà-kã̀ wà gbɛ̃ iŋɛ́ yèé náa ti náwù-kíbí ó yà gbà#á, nákó wáa wù, tsí bí ikú fúu. Ó ɖi, bí ɔ̀nyà-kã̀ wà gbɛ̃ iŋɛ́ yèé náa ti náwù-Mímí-Ɔ̀ɖáyé#ɛ́, nákó wáa wù, tsí bí àyɛ̀-àrìtã́ fúu. 9 Ńbɛ̀ɛ́, ore tsítse kó máa ká wa. Ó ɖi, bí àa wà ńnɛ̀ tsítse si làkóò, tsí ara kò kú wa#á, ìwèrè-kã̀ nákó wáa wá, tsí ore tsítse yèé àa gbɛ̃̀ si#ɛ́ nákó wù, tsí àa nákó rí tiwa ńnɛ̀ gé ni.

10 Báàyí#ɛ́, bí ɔ̀nà-kã̀ tsí fú wa ní àa kó tse ore fúnɛ gé ná, àa kó wà tseé làkóò. Tsí yèé yɔ#ɛ́, àa kó wà tse ore#ɛ́ fú ìnàbí olí-Yèésù ŋa.

Kpɔ́lù tɔ́ wà kã́rã́ ŋa si ró

11 Odzú-ŋɛ́ kó tó ìwé#ɛ́, tsí e rí kíbí ǹ kɔɔ́ fú ŋɛ́ gbà#á. Ɔma kíkã̀ lákṹ ŋa ní ǹ ń kɔɔ́ báàyí#ɛ́. 12 Ó ɖi, ɔ̀nyà kã̀ŋa wà, tsí à wà wo ká mú ara-ŋa tse ɔ̀nyà-ire nódzú-ɔ̀nyà kpó. Àŋa ní wà le oŋù si ńnɛ̀ kũkũ ní ɛ̀ŋɛ kó ɖákó†#ɛ́. À wà tse bɛ́ɛ̀ gé, àtsùgbée ká máa tsoró bá ŋa ni, iŋɛ́ yèé tse#ɛ́, bí à dzíkɔ̀ nóòtítɔ́ ti nára-kíbí à kã Kírísítò si ńǹtá-egi-ìɖáàgàlàdzà†, tsí ó kú#ɛ́, à nákó tsoró bá ŋa. 13 Tsí ɛnɛ yèé ŋa wà le oŋù si ńnɛ̀ kũkũ ní ká ɖákó fúnɛ#ɛ́, àŋa ká-ŋa gìɖì, à kò wà rɛ̃̀ si nɛ́kpa-Mɔ̀ɔ́sè†#ɛ́. Ó ɖi, à wà wò ní e ɖákó, tsí àŋa òŋu ká wà ń nya akpá ńǹkɛ̀ɛ́ gé ni. 14 Ó ɖi, èmi òŋu, ǹ kò wà wò láyé ní n mú iŋɛ́-kã̀ kpókpó nya akpá náànyì-kíbí à kã Yèésù Kírísítò Ɔlá-wa si ńǹtá-egi-ìɖáàgàlàdzà, tsí ó kú#ɛ́. Tsí gbà ńǹtá-ikú-Kírísítò#ɛ́, iŋɛ́-ìtalɛ̀ bí ŋa ɖà kíbí iŋɛ́ kúkú bɛ́ nódzú-mi, tsí èmi gbo, ǹ ɖà kíbí ɔ̀nyà kúkú bɛ́ nódzú-iŋɛ́-ìtalɛ̀ bí ŋa. 15 Tsí bí ɔ̀nyà-kã̀ ɖákó nàmí kò ɖákó, kò tsi nyɛ̀ŋɛ̀ ní kpã́dzú#ɛ́. Iŋɛ́ yèé kpã́dzú gé#ɛ́ ní wà dzɛ́ ní Ɔ̀ɖáyé kó tse wá nɔ́ɔ̀nyà titɔ̃#ɛ́. 16 Tsí ɛnɛ yèé ŋa kpó nákó rɛ̃̀ si ńǹtá-ɔ̀nà yèé#ɛ́ òŋu ɛnɛ yèé ŋa dzɛ́ ti Ɔ̀ɖáyé#ɛ́, tútùúrɔ̀-Ɔ̀ɖáyé kó gbé bá ŋa, tsí Ɔ̀ɖáyé kó rí ànyínɔ́ fú ŋa.

17 Báàyí#ɛ́, ɔ̀nyà-kã̀ kpókpó kó máa ɖá ìkparà-kã̀ fú mi ró, iŋɛ́ yèé tse#ɛ́, àkpà yèé ŋa ǹ gbà náàtsùgbé-Yèésù Ɔlá-mi#ɛ́, èsè-ŋà ŋa wà nára-mi si. 18 Ìnàbí-wa ŋa, Yèésù Kírísítò Ɔlá-wa kó tse ore-ɔ̀fɛ́ fú ŋɛ́. Ɛ̀tsɛ.