3
Hay Nangipa'adaogan Jesus hinan Na'akke' an Ngamay
(Mat. 12:9-14; Lk. 6:6-11)
1 Wa goh han ngilin an Habadu ya himmigup hi Jesus hinan himba'an di Hudyu. Ya wah di han tagun na'akke' di ngamayna. 2 Ya toto'lon din udumnan tatagu Hiyah unna iyadaog hinan ngilin an Habadu ta hiyay pangidalatandah pangidiklamuandan Hiya.a 3 Mu inilanay ninomnomda, at inalinah din na'akke' di ngamaynay, “Umali'a ta tuma'dog'ah tu.”
4 Ya inalin Jesus hinan tataguy, “Wa han alyo' ay da'yu ta tobalonyu. Hay inilayuh abuluton di Uldin tu'uh aton hi ngilin an Habadu? Hay maphod di aton, unu hay nappuhi? Ya baliwan di tagu, unu patayon?” Mu agguyda tembal.
5 Ya mabungot hi Jesus hi nanniganah din tatagu, ya munha'it di punnomnomanah aatda ti ngumhaydah mituduwan. Ya nunligguh eden na'akke' di ngamayna, ya inalinay, “Uyadom nan ngamaymu!” Ya unat goh inuyadna ya immadaog an nipaddung hidin oha. 6 Ya nakakda din Pharisees enen abung, ya nundapuhdan immuy ni'yamung hidin udumnah nan Herodiansb an ngadan di oha goh an himpampun, ya hinahapitday atondan mamatoy ay Jesus.
Hay Na'amungan din Tataguh nan Pingit di Lobong
(Mat. 12:15-21; Lk. 6:17-19)
7 Nakak da Jesus ya din intudtuduwanan nen babluy ta immuydah nan pingit di Lobong an Galilee. Ya do'olday tatagun nitnud ay Hiya an nalpudah nan Provinciad Galilee, 8 ya hinan Provinciad Judea, ya ad Jerusalem an kapitulyuda, ya hinan Provinciad Idumea, ya hinan abablubabluy hi dammang nan Wangwang an Jordan, ya hinan abablubabluy ad Tyre ya ad Sidon. Ya manu ay immuy nan tatagun Jesus ti dengngolday aat di ina'inatnan umipanoh'a. 9 Ya nunheglan do'olday tataguh nunli'ub ay Jesus. At inalinah din intudtuduwana ta idadaanday bangkah ihinana ta adi ipiton nan tatagu Hiya 10 ti do'ol di impa'adaogna, at hiyaat un an amin din way dogohna ya indulitday odoldan immuy ay Jesus ta way inatdan nanapan Hiya ta umadaogda. 11 Ya wa ay ta tinnig nan nappuhin lennawan nun'eh'op hinan tatagu ya numpunhippidah inayungan Jesus, ya nuntu'u'dan inaliday, “He"ay Imbaluy Apo Dios!” 12 Ya inhamad Jesus an nummandal ay dida ta adida ibaag di aatna.
Hay Namto'an Jesus hinan Himpulu ta Duwan Apostolesnac
(Mat. 10:1-4; Lk. 6:12-16)
13 Wada han ohan algaw ya nunti'id hi Jesus hinan duntug, ya inayagana nan penhodnan mangunud ay Hiya. Ya unat goh na'amungdah din wadana 14 ya pento'nay himpulu ta duwan nginadananah apostoles.d Didanay pi'yibbana ta honogona didan umuy muntudtudu, 15 ya indatnay abalinandan munla'ah hinan dimunyu. 16 Ya hiya hatuy ngadan nan pento'na: hi Simon (an nginadnana ta hi Peter), 17 ya dana' Zebedee an da Jacobe ay John (an nginadnan Jesus didah Boanerges an hay ibalinana ya Imbabaluy nan Idul), 18 ya pento'na goh hi Andrew, ya hi Philip, ya hi Bartholomew,f ya hi Matthew,g ya hi Thomas, ya hi Jacobh (an hina' Alphaeus), ya hi Thaddaeus,i ya hi Simon (an niddum hinan himpampun an ma'alih Zealotj), 19 ya hi Judas Iscariot (an mangitudun Jesus ta dapopondah udum di algaw).
Hay Aat Jesus ya hi Satanas
(Mat. 12:22-37; Lk. 11:14-23)
20 Himmigup da Jesus hinan abung, mu do'ol goh di tatagun immuy ay Hiya, at mid aton da Jesus ya din intudtuduwanan mangan. 21 Ya unat goh dengngol din tutulang Jesus an inalin din udum an tataguy un mun'angaw hi Jesus at immuydan mangawit ay Hiya.
22 Ya din muntudtuduh nan Uldin an nalpud Jerusalem ya inaliday, “Neh'op ay Jesus hi Beelzebubk an nan ap'apun di dimunyu, at hiyanan abalinanan munla'ah hinan neh'op!”
23 Mu i'innilan Jesus henen inalida, at inayagana din tatagu, ya inulgudnay nipa"el ta panginnilaandah aatna, ya inalinay, “Undan la'ahon Satanas di dimunyuna goh? Ti diday nilammung hi hakupna! 24 Ya gulat ta nan himpangili ta mumpapatoyda nan tataguh di at mapa"i danen himpangili! 25 Ya umat goh hinan hina"ama ti gulat ta mumpapattoyda at la'tot ya madughayda, ya nunhihiyan danen hina"ama! 26 Ya umat goh hinay aat di hakup Satanas ti gulat ta la'ahon Satanas di dimunyuna goh at la'tot ya numpapattoyda, ya mapa"i nan hakup Satanas! Mu adida ahan aton di umat hina.
27 Gulat ta waday mamhod an mangakaw hi gina'un nan mabi'ah an lala'i ya hay mahhun hi aton nan mangakaw ya bobodonah mahhun henen mabi'ah an lala'i ta way atonan mangngal hinan gina'una. 28 Nomnomonyuh te: an amin di bahol di tatagu ya nan pamihulandan Apo Dios ya aliwan Apo Dios hanah unda muntutuyu. 29 Mu nan mamihul hinan Na'abuniyanan an Lennawa ya adi al'alliwan Apo Dios ti nan umat hinan bahol ya adi ahan ma'al'alliwan ta nangamung.” 30 Ya manu ay inalin Jesus hene ti nan nangalyandah un waday nihu'lung hi nappuhin lennawan Hiya.
Hay Ommod ya A'agin Jesus
(Mat. 12:46-50; Lk. 8:19-21)
31 Otog di pun'ul'ulgudan Jesus ya nidatong hi inana ya din a'aginan linala'ihl nan wadana, ya timma'dogdah nan gettaw, ya hennagday umuy mangayag ay Hiya. 32 Ya inalin din tatagun numpangabun an nunli'ub ay Hiyay, “Wah dih inam ya nan a'agim an pa'ayag da'a!”