Jonah 2

Hay Nunluwaluan Jonah

¹ Ya hidin wadan Jonah hi putun nan ekan ya nunluwalun Apo Dios an dayawonan ² inalinay,

“Nan punligligata' ya wa ay ta munluwalua' ay He"a, Apo Dios, ya dengngolmu,

ya hidin paddungnay awada' hinan maluhung an lubu' ya dengngolmu.

³ Ya impipa'bawa' ay He"ah nan maluhung,

ya nunlononga' hi bunol nan baybay,

ya gunna' punhinnigiyon hinan dalluyun.

⁴ Ya alyo' hi unna' inyadagwin He"a ta adi da'a tigon,

mu hemmo'a' ay He"a ta mabalin an tigo' goh nan me'gonan an Timplum.

⁵ Ya hene'noba' hinan danum ta linumnonga' hi ad dolom,

at linibutana' hi holo' hinan baybay.

⁶ Ya immuya' hinan bunol di baybay hinan puun di aduntuduntug an nahe'nob,

ya alyo' di mid mapto' ya munnanonga' hidih nan lugal

an adi ahan mabalin an mibughul di pantawna!

Mu He"a, O Apo Dios an dayawo', di nummahun ha"in ta timmagua'!

⁷ Ya unat goh magadyuh an matoya' ya ninomnom'u He"a, Apo Dios, at nunluwalua' ay He"a,

ya dengngolmuh nan way awadam hinan me'gonan an Timplum.

⁸ Mu nan man'ug ay He"a an nan mundayaw hi bulul an mi'id ahan di hulbina

ya adida mumpahmo' ay He"a an ta"on hi unmu pa'ahhom'on dida.

⁹ Mu ha"in ya He"ay pangikantaa' hinan pundayaw'u,

ya pangiyalia' hi e'nong'u ta ipa'annung'u nan intulag'un He"a

ti He"a ya anggay di alpuwan di pi'taguan.”

¹⁰ At hi Apo Dios ya minandalna din ongol an ekan ta umuyna utaon hi Jonah hinan pingit di baybay. At na'at.