3
Hay Pummoltaan Apo Dios hinan Holag Israel ti nan Nun'appuhin Ato'atonda
1 Umat goh hituy hinapit Apo Dios ay ha"in hi aat tu'un holag Israel an holag din enekaknad Egypt 2 an inalinay,
“An amin nan tataguh tun luta ya da'yu ya anggay di pento"uh tatagu',
mu ta"on un umat hina ya moltao' da'yun dumalat nan numbaholanyu.”
3 At ha"in an hi Amos ya inali' di,
“Undan namaag ya nuntunud di duwan taguh unda agguy nuntulag?
4 Ya undan namaag ya mun'ali nan layon hi bubulung hi un mi'id ah dempapnah onona?
Ya undan mun'ali goh nan bu'tot an layon hi un mi'id ah dempapna?
5 Ya umat goh hinan hamuti an adi namaag ya na'nah un mi'id di tappang nan lengon,
ya adi goh namaag ya nalad nan lengon hi un mi'id di ma'na.
6 Ya gulat ta mipagangoh nan talampet an mangipa'innilan waday gubat
ya undan udot adi tuma'ot nan tataguh nan siudad?
Ya umat goh hinah un namaag ya waday ligat an undan bo'on hi Apo Dios di nangiyabulut?
7 Ya immannung an hi Apo Dios an na'abbagbagtu ya ipa'innilanah nan baalnan propeta
an amin nan ninomnomnan aton ya un ma'at.
8 Nan layon ya mun'ali ta way aton nan tatagun tuma'ot,
ya umat goh an gahin un ipa'innilan nan propeta nan Hapit Apo Dios
ta way aton nan adi mangunud an tuma'ot.
9 At da'yun a'ap'apud Egypt ya ad Ashdod ya inalin Apo Dios ay da'yu
ta ipa'innilayuh an amin hinan tatagu
an mahapul an umuydan amin hinan aduntuduntug ad Samaria
ta amangonda nan nidugah an pangatdah nan i'ibbadah di.
10 Ti inalin Apo Dios di,
Daden tataguy amangonyu an punuwonday a'abungdah nan inakawda,
ya hinan penlohda,
ya hinan nun'alada an dumalat nan inatdan nappuhi!
11 At hiyanan awniat umali nan buhulyua ta li'ubonda nan babluyyu,
ya pumpa"ida nan nun'ihamad an allupyu
ta punhamhamda nan nun'abalul an gina'uyu.
12 Ya inalin goh Apo Dios di,
Nahnot hinan iSamaria di mabalin an lumayaw,
mu ta"on un umat hina ya hay ma'angang hi ilayawda ya un anggay di pungan ya hu'in di kama.
At mi'id di hulbin hanan ilayawda an umat hinan mumpahtul hinan kalnilu an mi'id di hulbin di bumaliwana
ti umu'uddum ya un anggay di inga unu hu'iy gunna' ah'upan an ma'angang.”
13 Ya inalin goh Apo Dios an nidugah di abalinana ay ha"in di, “Donglom hete ta ibagam hinan i'ibbam hi ad Israel di,
14 Nan gutud di pummoltaa' ay da'yud Israel an dumalat nan baholyu
ya pumpa"i' nan pun'onngan hi ad Bethelb ta magahda nan paddungnay ingan nan pun'onngan.c
15 Ya pumpa"i' goh nan mun'aphod an abungda an ihinandah un tungnin unu tiyalgaw
an ta"on hi un nun'a'al'altian hi ivoryd unu ongol an abung.
Hiyah ne hinapit Apo Dios.”