7
1 Ya inalin Apo Dios di,
“Mu nihimung an nappuhiy gunyu aton
an namamad Samariaa ti layahanyuy i'ibbayu,
ya wada goh ay da'yuy mangakaw ya humod'ap.
2 Ya hay punnomnomyu ya agguy'u inilan amin nan nun'appuhin gunyu aton,
mu hay immannung ya i'innila' an nan pumbaholan gunyu aton.
3 Ti ta"on tuwalih un nan aliyu ya nan u'upihyalna
ya pun'amlonganda nan layahyu ya nan nun'appuhin ato'atonyu.
4 Ya umat ayu goh hinan babain din'ugnay ahawana ta immuy ne'yengha.
Ti dumalat nan namenhodanyun gun mumbahol
ya niyummat hinan mabi'ah an apuy hinan punhaangan hi tinapay an adi dumoldolnat.
5 Ya wa ay goh ta nadatngan nan behtan nan aliyub
ya ni'bubutong hinan u'upihyalnac
an me'me'yat hinan gun aton nan tatagun mumpungngohoy.
6 Ya nan bungotyu ya umat hinan apuy an bumalabalah nan mahdom
ya wa ay ta yupyupan hinan helhelong ya madanalang.
7 At dumalat enen nidugah an bungotyu ya mi'id di ogonyun mamatoy hinan a'ap'apuyu.
Mu ta"on un umat hinay na'na'at ya mi'id di ohah nan tataguh
numpahmo' an mumpabadang ay Ha"in.”
8 Inalin goh Apo Dios di,
“Da'yun i'Israel ya nipaddung ayuh nan tinapay
an nalutuy balina ya agguy di balina.
9 Ti nan nidugah an nundenolanyuh nan tataguh nan nunlene'wohyu
ya unyu pinalpaliwan ya mid mahkay ologyu
ti nun'a'in'inna ayu unu nun'ala'ay ayu.
10 Mu ta"on un ayu umat hina ya adi ayu mumpa'ampa ta mumbangngad ayun Ha"in.
At hiyah ne attiganan nibahhaw ayu.
11 At hiyanan umat ayuh nan kalapati
an ag'agan mabaliyan ti mid poto' di punnomnomna.
At mumbi"ahan ayun umuy mumpabadang hinan i'Egyptd ya i'Assyria.e
12 Mu alyo' ay da'yu an ta"on un ngadan di ayanyu
ya umata' hinan tagun manawang hi hamuti ta tawango' da'yu
ta ipa'annung'u din inali' an moltao' da'yu.
13 At hiyanan mahmo' ayu ti hay ligat ya a'ubahanyuy
lagbuyun nan'ug ay Ha"in.
Ti un gulat at ya baliwa' da'yu,
mu adi ti inlayalayahana' ay da'yu.
14 Ya hinkilkilaonyun munluwalu,
mu bo'on Ha"in di punluwaluanyu ti hi Ba'al.
Ya hugatonyuy odolyu ta olom ya donglona ya winagahana nan intanomyu.
15 Mu Ha"in an nuntudtudu ya nangipabi'ah ay da'yu
di pumbalinonyun mi'buhul.
16 Ti ngohoyona' an na'abbagbagtun Dios,
at hiyanan umat ayuh nan napikun panan adi mepto' hinan panaona.
Ya manuy panapit nan a'ap'apuyu,
mu patayon nan buhulyu dida.
At awniat un da'yu ab'abatlan hinan i'Egypt.”