5
Hay Moltan nan i'Israel ya iJudah
1 Ya inalin goh Apo Dios di,
“Donglonyuh ten alyo' an da'yun papadi, ya da'yun i'Israel, ya ta"on un da'yun pamilyan di ali
ti un gulat at ya da'yuy maphod di pangipanuhnah nan malgom,
mu un ayuat goh numbalin hi hulun a'naan di tatagud Mizpah,a
ya tawang an nebe'lag hinan Duntug an Tabor ta omod unda do'ol di tatagun ma'na.
2 Ti hanan pumbahbaholanyu ya paddungnay limmamut hi nitaguanyu,
at hiyanan moltao' da'yuh udum di algaw.
3 Ti i'innila' an amin nan ina'inatyun i'Israel.
Ya hay pannig'un da'yu ya umat ayuh nan babain din'ugnay ahawana ya immuy ne'yengha,
at hiyanan adi' da'yu abuluton.
4 Ti hanan nun'appuhin ato'atonyuy adiyu namhodan an mumbangngad ay Ha"in an Dios.
Ti popohdonyu ahan an dayawon nan udum an dayawonyu,
at hiyanan adia' abuluton an Ap'apun Diosyu.
5 Ya nan adiyu pumpa'ampaan an i'Israel di attiganan nibahhaw ayu.
At hiyanan matoy ayu an ta"on goh un da'yun iJudah.
6 At ta"on hi unyu e'nong di baka unu kalnilu ay Ha"in
ya mi'id di hulbina ti adi' abuluton
ti din'ug'u nongkay da'yu.
7 Ti mi'id di denolyun Ha"in an Dios an un at goh nan udum an madayaw di nundenlanyu.
At hiyanan ta"on un nan imbabaluyyu ya mi'id hulbidan Ha"in,
at ma'ubah ayun amin an ta"on un nan pahtuyu.”
Hay Amoltaan di iJudah ya i'Israel
8 Hin'alina goh ya inalin Apo Dios di,
“Mundadaan ayun holag Benjamin ta ipagangohyu nan talampet
ta madngol ad Gibeah, ya ad Ramah, ya ad Beth Avenb ta mipa'innilan waday gubat.c
9 Ti nadatngan mahkay di a'ubahanyun amin an i'Israel,
at adi ayu dumenodenol
ti umannung nan inali' an ubaho' nongkay da'yu.
10 Ya ta"on un nan a'ap'apud Judah
ya umatdah nan tagun unna gulaton an mangipahlig hi igad,d
at hiyanan nan bungot'u ya ay danum an ihiit'un dida.
11 Ya da'yun i'Israel ya nidugah di punligatanyu
ti hiyah ne lagbuyun nundayaw hinan mi'id di hulbinan bulul.
12 At ad ugwan ya hay pummolta' ay da'yun i'Israel
ya umat hi pangat di la'oy an mama"ih nan lubung.
Ya hay pangat'uh nan iJudah ya umat hi pangat di lu'lu' hinan ayiw.
13 At hidin le'naonyun i'Israel an mid ologyu
ya nan iJudah an dumalat di hugatda
ya umuy ayu mumpabadang hinan alid Assyria.e
Mu mi'id di abalinandan bumadang ay da'yu.
14 At mi'id di mabalin an mamaliw ay da'yun i'Israel ya iJudah hinan pummolta'
an umat hi pangat di layon an mangilayaw ay da'yu ta ma'ubah ayu.
15 At du'go' da'yun tatagu' ta engganah muntutuyu ayuh baholyu,
at mumpahpahmo' ayun mumpabadang ay Ha"in
ti gapun nen holtaponyu ya hapulona' mahkay ay da'yu.”