27
Hay Miyebel ad Tyre
1 Inalin goh Apo Dios ay ha"in di, 2 “Ezekiel, eyebelmu ni' nan meyebel hi ad Tyre an dumalat nan ma'at enen babluy 3 an buhhu'an an umuy hinan baybay an pungkumilduan di abablubabluy an alyom di,
Da'yu an iTyre ya alyon Apo Dios di ipahiyayu anuy
amaphod nan numbabluyanyu.
4 An gapu ta mapmaphod di niyamman nan babluyyu
an umat hinan ma"aphod an pupul an wah nan gagwan di baybay
5 ti hay dedengna ya bolbol an nalpuh nan Duntug an Hermon,
ya hanan tu'ud an nigagwah nan pupul ya cedar an nalpud Lebanon.
6 Ya hana ay an punggaudyu ya hay niyamma ya nan ayiw an oak an nalpud Bashan,
ya nan dotal di pupulyu ya nan ayiw an cypress an na'al'altian hinan ivorya an nalpud Cyprus.
7 Ya hana ay goh han naboldaan an linen an nun'itayun an halapan di pupulyu
ta bumadang an mangitulud hinan pupul ya nalpud Egypt.
Ya hana ay goh an punlidumanyun paddungnay bantilayu
an hay niyamma ya nan nun'anginan lo'ob an munggudlab ya mumpugagawc
ya nalpuh nan pingit di baybay ad Elishah.d
8 Ya hana ay an punggaggaudonyuh nan pupulyu ya nan i'ibbayun iSidon, ya i'Arvad,e
ya hay mangimunihuh nan pupulyu ya nan i'ibbayun iTyre.
9 Ya inawityu nan i'ibbayun iGebalf ta wada ay di napa"ih nan pupul ya impaphodda,
ya an amin nan mumpumbiyahin pupul ya umalidan luma'uh nan ila'uyu.
10 Ya nan titindaluyun numpunhapiaw ya numpunhelmet
ya nalpudad Persia, ya ad Lydia,g ya ad Libya ta diday mangibaliw ay da'yu.
Ya pun'ihabluyda nan helmetda ya hapiawdah nan allupyu,
at ma"aphod di tigawna.
At gapun dida ya nundongol di aatyuh nan abablubabluy.
11 Ya hana ay goh an guwalyayu ya nalpudad Arvad ya ad Helekh
an diday mungguwalyah nan allup ya nan pantaw di allup di babluyyu.
Ya hana ay goh an nalpud Gammadi ya diday mungguwalyah nan ata'nang an abung an pun'adugan.
Ya nun'ihabluyda goh nan hapiawdah nan allup,
at inyal'allanan ma"aphod di tigaw nan babluyyu.
12 Ya nan iTarshishj an umalin luma'uh nan ila'uyu ya hay pamayadda ya silver, ya gumo', ya lata, ya nan purbura.k
13 Ya nan iGreece, ya iTubal,l ya iMeshekm ya hay pamayadda goh ya hay himbutda, ya nan gina'udan gambang di niyamma.
14 Ya hay ibayad ay nan iBeth Togarmahn ya kabayu an mabalin an muntamu, ya nan kabayun ma'usal hi gubat, ya nan alyondan mulo an kabayu goh.
15 Ya ta"on hi un nan iRhodesp ya nan bimmabluy hinan pingit di baybay ya luma'udan da'yu an hay pumbayadda ya hay ba'git di elepante an ma'alih ivory ya nan ma'ulhin ayiw.
16 Ya nan i'Aramq ya pun'iyalida nan nun'abalul an batu, ya nan mun'aphod an lo'ob an mumbolah, ya nan nun'aboldaan an lo'ob, ya umat hinan nun'abalul an batun ma'alah baybay an coralr ya nan rubys ta ihukatdah nan ila'uyu.
17 Ya ta"on hi un nan iJudah ya nan i'Israel ya hay ihukatdah nan ila'uyu ya nan wheat an nalpud Minnith, ya nan danum di iyu'an, ya nan kindi, ya nan lanan olibo, ya nan mumpabangluh ma'an.
18 Ya hay pumbayad ay goh nan iDamascust hinan alandan ila'uyu ya nan ma'inum an malpud Helbonu ya nan dutdut di kalnilu an malpud Zahar.v
19 Ya nan mumpungkumildun holag Dan an didah nan iGreece an malpud Uzalw ya luma'udah nan ila'uyu an hay pumbayadda ya nan pumpabangluh ma'anx ya nan nabohal an gina'u.
20 Ya hay pumbayad ay goh nan iDedany hinan alandan ila'uyu ya nan uloh an miyap'ap hi bonog di kabayu.
21 Ya hay ihukat ay goh nan i'Arabia an didah nan i'ibbadan a'ap'apud Kedarz ya nan uyaw, ya nan manilhig an kalnilu, ya gandeng.
22 Ya hay pumbayad ay goh nan iShebaa ya iRaamahb ya nan nun'abalul an batu an umat hi balitu' ya nan mun'aphod an pumpabangluh ma'an.
23 Ya ta"on un nan iHaran,c ya iKanneh,d ya i'Eden,e ya iSheba, ya i'Ashur,f ya iKilmadg an mumpungkumildu ya 24 pun'iyalida goh di mun'aphod an lo'ob an munggudlay kolol di udum, ya naboldaan di udum, ya nan abo' an numbino'ob'on di kololna, ya nan nun'ahamad an tali.
25 Ya hay pumpangilugananyuh nan do'ol an ila'uyu ya nan pupul di iTarshish,
ya nipaddung nan babluyyun ten pupul an napnuh gina'u.
26 Mu hidin awadanyuh gagwana ya paddungnay umali nan mabi'ah an puo',h
ya pina"ina nan pupul an nilugananyu.
27 At an amin ayun paddungnay ni'lugan hinan pupul an titindalu,
ya kalpentelo,
ya nan mumpungkumildu,
ya ta"on hi un nan mumpummunihuh nan pupul ya paddungnay mumpunlonong ayu.
Ya paddungnay munlonong hinan baybay nan do'ol an nun'abalul an inadangyanyun wah nan pupul.
At umat hinay ma'at hinan babluyyu.
28 At paddungnay mun'alawaaw di tu'u'yun mumpunlonong
an ay ihunay umalyog nan pingit di baybay.
29 At nan mumpuntamuh nan udum an pupul ya puntataynanda nan pupulda
ta mumpapanguydah nan pingit di baybay ta amangondah nen ma'at ay da'yu.
30 At dumalat enen ma'at ay da'yu ya pun'it'u'day kilada,
ya pun'iloglogday hupu' an gunda mumpunlapug hinan dapul.
31 Ya pummukmukanday uluda,
ya numpunlubungdah langgut
ti nidugah di punlungdayaandan nen ma'at ay da'yu.
32 Ya umayadyo'dah nan ma'at ay da'yu an alyonday,
Mi'id di mipaddung hi amaphod nan babluy ad Tyre,
mu namengpenghan an na'umah hinan baybay!
33 Do'ol din impa'amlongyun mumpungkumildu,
ya do'ol din impa'adangyanyun ali an dumalat nan mun'aphod an ila'uyu.
34 Mu ad ugwan ya napogpog ayu an paddungnay nilubu' ayuh bunol di baybay,
ya an amin nan inadangyanyu ya ta"on hi un nan puntamuonyu ya ni'lubu'dan da'yu.
35 At awniat manoh'a nan bimmabluy hinan pingit di baybay enen ma'at ay da'yu.
At ta"on hi un nan alida ya ma"attig hi angahda
an nidugah di tuma'tandah pangngolandan nen ma'at ay da'yu.
36 Ya umat goh hinan mumpungkumilduh nan abablubabluy
an nidugah di tuma'tandah nan ma'at ay da'yu.
Umat hituy ma'at ay da'yu ta apogpoganyu nongkay an iTyre.”