19
Hay Miyebel hi un way Matoy hinan Alid Israel
1 Ya inalin goh Apo Dios ay ha"in di, “Iyebelmu ni' heteh un way matoy hinan imbabaluy nan alid Israel 2 an alyom di,
Da'yun holag Israel ya paddungnay hi inayu nan ohan mabi'ah ya na'atullid an layona
an impapto'nay imbabaluynah engganay unda immilog.
An ta"on hi unda wah nan nunlene'wohday mun'abungot goh an layon.
3 Ya impapto'na nan ohan imbaluyna,b
at ma'abbi'ah,
ya intuduwana ta abalinanan umanup,
ya ininnilanan umihdah tagu.c
4 At nundongol di aatnah nan abablubabluy,
ya tiniliwda an paddungnay binituda.
Ya gino'danda,
ya inyuydad Egypt.
5 Mu hidin hehennod inana ya mi'id heden imbaluynan mumbangngad
at itudduwana goh nan ohan imbaluyna ta numbalin hi mabi'ah an layon.d
6 Ya niddum hidin i'ibbanan layon,
at natuduwan an umanup ya uman hi tagu.
7 At numpa"inay allup,
ya numpa"ina goh nan babluy nan tatagu,
at hiyanan dengngol ay nan tatagun munheel ya nidugah di ta'otda.
8 Ya waday immali goh hi tatagun nalpuh nan numbino'ob'on an babluy hinan nunlene'wohda
ta lini'ubda ya tiniliwda an paddungna goh di binituda.
9 Ya umat goh an imbaludda ya inyuydad Babylon,
at heten Alin hi Jehoiachin an nipaddung eden layon ya imbaludda,
at mi'id di gun madngol hi paddungnay heelnah nan aduntuduntug ad Israel.
10 Ya paddungna goh di hi inayue ya nan greyp
an nitanom hinan pingit di ginnaw an punnonngan di danum,
at maphod an mumballuy tubuna,
ya mamunga.
11 Ya ma'ulhiy hapangna,
at mabalin an miyammah ma'alih scepter,f
Ya hemme'on,
ya nidugah an ata'nang,
at ma"attig ahan.
12 Mu dumalat nan nidugah an bungot'un da'yun iJudah
ya paddungnay bu'nuto' ya intapal'u da'yu.
Ti umalida nan iBabylon ta gubaton da'yu,
at ma'ubah ayu.
An diday ipaddungan nan tuyup an malpuh buhu'an di algaw,
ya umat ayun nen greyp an matuyupan ta ma'leng,
mu ta"on hi un nan hapengna ya ma'leng,
at mapuulan.
13 Mu waday hapengnan nitanom hinan mapulun
an lumahu ya mamagan luta.g
14 Mu palpaliwan ya dimmalangh din greyp,
at noghob an amin nan bungana ya nan hapengna,
at mi'id di mabalin hi miyammah ma'alih scepter di ali.
Hiyah ne miyebel hi un way matoy.”