Jeremiah 36

Hay Inat Jehoiakim hinan Impitudo' Apo Dios ay Jeremiah

¹ Hidin miyapat hi tawon^a hi nun'alian Jehoiakim^b an hina' Josiah an alid Judah ya ni'hapit hi Apo Dios ay ha"in an hi Jeremiah an inalinay, ² “Nete"ah din hi Josiah^c di alid Judah ta engganad ugwan ya do'ol di impa'innila' ay he"an ma'at hi ad Israel, ya ad Judah, ya nan udum an babluy. At alam di ohah nan puntud'an ta itudo'mun amin dade din inali'ali' ay he"a. ³ Ta mibahah nan tatagud Judah ta olom ni' ya donglonda ay nan nitudo' an pummolta' ay dida ya idinongda nan ato'atondan pumbaholan ta aliwa' mahkay nan nun'appuhin ato'atonda.”

⁴ At inayaga' hi Baruch^d an hina' Neriah^e ta badangana'. At inali' an amin nan hinapit Apo Dios ay ha"in, ya intudo'nah nan nali'up an pangitud'an. ⁵ Ya hidin nalpah ya inali' ay Baruch di, “Ha"in ya nipawaa' ta adi mabalin an umuya' hinan Timplu. ⁶ At he"ay umuy hidih un madatngan nan algaw an punlangduan di tataguh dih nan Timplu, ya imbaham nan intudo'mun Hapit Apo Dios. At donglon nan tatagun ma'amung an malpuh nan abablubabluy hitud Judah. ⁷ At olom ni' ya du'gonda nan impa'enghadan pumbaholan, ya mumpahmo'dan Apo Dios ta adi miluh an mipa'annung nan pummoltan Apo Dios ay didan dumalat nan nidugah an bungotnah nan gunda aton!”

⁸ At inat Baruch an hina' Neriah an amin din inali' an hi Jeremiah, at immuy hinan Timplun Apo Dios, ya imbahana din hinapit Apo Dios hinan tatagun na'amung.^f ⁹ Ya hay na'atan te ya nan algaw an punlangduan^g hidin miyahiyam an bulan hidin miyalemay tawon hi nun'alian Jehoiakim.^h At an amin din i'ibba' an iJudah ya na'amungdan nundayaw hidih nan Timplu eden algaw. ¹⁰ Ya hidin numbahaan Baruch hidin impitudo"u an hi Jeremiah ya wah dih nan kuwaltun Gemariahⁱ an hina' Shaphan^j an din nabagtun mumpapto' hinan punhumalyaan di ali.^k Heden kuwaltu ya wah dih nan way nammagtun gettaw di Timplu an neheggon hinan ma'alih Pa'idyamman Pantaw nan Timplu.

¹¹ At hidin dengngol nan imbaluy Gemariah an hi Micaiah^l an ap'apun Shaphan din nibaha an Hapit Apo Dios ¹² ya nundadyun immuy hinan palasyun di alih nan kuwaltun Elishama^m an muntudtudo'.ⁿ Ya hay wah di ya hi amanan hi Gemariah an hina' Shaphan, ya nan i'ibbanan u'upihyal an umat ay Delaiah^o an hina' Shemaiah, ya hi Elnathan^p an hina' Acbor,^q ya hi Zedekiah^r an hina' Hananiah,^s ya nan udum. ¹³ At inalin Micaiah din dengngolnan imbahan Baruch hinan tatagu. ¹⁴ Ya hennag din u'upihyal hi Jehudi^t an hina' Nethaniah^u an ap'apun Shelemiah^v an holag din a'apun Cushi ta umuyna ayagan hi Baruch ta iyuyna din nali'up an nitud'an din imbahanah nan tatagu. At immuy hi Baruch hi awadan nan u'upihyal an inodnana din nali'up an nuntud'ana. ¹⁵ Ya inalidan hiyay, “Umbun'a ta ibaham ni' ta donglonmi.”

At imbahan Baruch ay dida. ¹⁶ Mu hidin impada'puhnan imbaha ya nidugah di numanomnomandan alyonday, “Mahapul an ipa'innila tu'uh nan alih ten dengngol tu'u!” ¹⁷ Ya inalidan Baruch di, “Dan waday nangalin he"ah itudo'mu hana?”

¹⁸ Ya tembal Baruch an inalinay, “O wada an hi Jeremiah di nangalih itudo"un ten nali'up daten inali'alina. At intudo"u.”

¹⁹ Ya inalin nan u'upihyal ay Baruch di, “Mahapul an umuy ayu mipo"oy an duwa ay Jeremiah! Ya adiyu ipa'innilah malgom an taguy awadanyu!”

²⁰ Ya intalepon nan u'upihyal din impitudo"un hi Jeremiah hinan kuwaltun Elishama an muntudtudo',^w ya immuyda inalih nan ali din dengngolda.

Hay Nanghoban nan Alin hi Jehoiakim hinan Nitud'an di Hapit Apo Dios

²¹ Ya hennag nan ali hi Jehudi ta immuyna innal din impitudo"u an hi Jeremiah hinan kuwaltun Elishama. Ya imbahanah nan ali an wan numpangata'dogda nan u'upihyalnah nan dellohna. ²² Ya heden miyahiyam an bulan ya lawang,^x at nidugah an tungnin, at nan ali ya wah din hinahagangna nan apuy an mun'anidu. ²³ Ya wa ay ta binahan Jehudi di tulu unu opat an nalinyan nitudo' owan ginogod nan ali din nalpah an nibaha, ya intungunah nan apuy. At la'tot ya noghob an amin din nitud'an nan Hapit Apo Dios an din impitudo"u. ²⁴ Mu mi'id di impattig nan ali ya nan u'upihyal hi puntutuyuanda unu ta'otdah nan dengngolda. ²⁵ Ya ta"on tuwalih un hidin numpahpahmo'an da Elnathan ay Delaiah ya hi Gemariah hinan ali ta adina gohbon nan nitudo', mu adina dongdonglon. ²⁶ Ti unnaat goh minandal hi Jerahmeel^y an imbaluyna, ya hi Seraiah an hina' Azriel,^z ya hi Shelemiah an hina' Abdeel^a ta umalida ta tiliwon da'mi ay Baruch. Mu mi'id ami ti hi Apo Dios di nangipo"oy ay da'mi.

²⁷ Ya hidin nalpah an genhob nan ali din nangitud'an Baruch hidin inali'ali' an hi Jeremiah ya inalin goh Apo Dios ay ha"in di, ²⁸ “Ummal'a goh hi ohah puntud'an ta ipidwam an ipitudo' an amin din nitudo' hidin genhob Jehoiakim an alid Judah. ²⁹ Ya inalim ay hiyay, Hay inalin Apo Dios ya manu ay genhobmu din nitudo' ya dumalat hidin nipa'innilan pa"ion nan alid Babylon heten babluy, ya numpatoynan amin nan tatagu ya animal. ³⁰ At hiyanan umat hituy hinapit Apo Dios an inalinay, He"a, Jehoiakim an alid Judah, ya mi'id di holagmuh mihukat ay he"an mun'ali^b ti pi'patoy da'a ta mitapal di odolmu. ³¹ At umat hinay pummolta' ay he"a ya nan pamilyam an dumalat nan numbaholanyu. Ya moltao' nongkay an amin nan tatagud Judah an ta"on un nan wad Jerusalem an kapitulyuna. Ti inali'ali' tuwalin da'yu an umat hinay pummolta' ay da'yu, mu paddungnay agguyyu dengngol.”

³² At innal'un hi Jeremiah di oha goh hi puntud'an, ya indat'un Baruch an hina' Neriah. At impidwa' mah goh an inali an wan gunna itudo' an umat hidin hopapna ta engganah nalpah an amin. Mu do'do"ol di nitudo' eten miyadwa.