9
1 Ya inali' goh di,
“Un gulat ta adi mapuh di lugwa' ta umat hinan obob an adi matmatdu'
at mabalin an hinan mahdom ya mapatal ya kilaa' nan i'ibba' an pinatoy di buhul!
2 Maphod hi un wada ah lugal hi punhituwan hidih nan mapulun an umiyanan nan munle'le'od
ta hiyay aya' an munhitu ta tayna' nan tataguh nan ni'babluya'!
Ti gunda umilugtap,
ya adida mangngol.”
3 Ya umat goh an inalin Apo Dios di,
“Nan tatagu' ya hay immenghah hapitonda ya nan layah an puma"i
ti adida pohdon an unudon nan makulug.
At hiyanan iyal'alladan mangat hinan do'ol an nappuhi,
ya adida haggungon an Ha"in hi Apo Dios.
4 Olom ni' ya way ohaan hahalepatanay heneggona,
ya ta"on nan i'ibbana ya adiat mundenol ay dida.
Ti way ohan didaan hay pamalbaliyanah i'ibbanay nomnomnomona,
ya hay puma"ih ibbanan taguy hapihapitona.
5 Ta un nonongan unda hinkukuluk,
ya mi'id di mangibaag hi makulug.
Ti emmenghah un nan pumbaholan di atonda.
6 At un hay layah di impa'enghada,
ya adida pohdon an innilaona' ay dida.”
Hiyah ne hinapit Apo Dios.
7 At hiyanan inalin goh Apo Dios an nidugah di abalinanay,
“Mahapul an iyabulut'uy punligatan daten tatagu ta umat hinan mahinhin an balitu'
ta mayagyagan nan adi maphod.
8 Ti maphod di hapitondah i'ibbada,
mu un at hay pamatayandan diday nomnomnomonda.
At nan layahda ya umat hinan hulit di panan nalamutan hi bininun pumatoy hi e'naana.
9 At hiyanan Ha"in an Dios an nidugah di abalinana ya mahapul an moltao' didan himpamabluy.”
Hiyah ne hinapit Apo Dios.
Hay Nunlungdayaan Jeremiaha
10 Ya ha"in an hi Jeremiah ya inali' di,
“Nidugah an munlungdayaa',
ya adi medpol di kila' ti nan ma'at hinan pahtuh nan aduntuduntug an mamagananda.
At mi'id di mange'wah di,
ya mami'idda nan baka, unu malgom an animal, ya hamuti ti lumayawda.”
11 Ya inalin Apo Dios di,
“Manu ay ya hay ato' ya pa"io' an amin nan babluy ad Judah
an umat hi ad Jerusalem an kapitulyuna ta mumbalin hi mapulun.
At nan animal an jakalb hi inalahan ya ammunay munhituh di an bo'on hay tatagu.”
Hay Dumalat hi Napa"ian ad Judahc
12 At inali' ay Apo Dios di, “Apu, an amin ami ya adimi ahan ma'awatan nan na'at hi ad Judah an namaag ya numbalin hi mapulun. Anaad ahan ta nunheglay napa"iana ta omod un mi'id di namhod an munle'le'od hidi?”
13 Ya tembal Apo Dios an inalinay, “Manu ay na'at hana ti din'uga' hinan tatagu' an agguyda inunud din Uldin'u ya tudtudu' 14 an hay inunudda ya nan pohpohdonda. Ta nan bulul an hi Ba'al di dinayawda an hiyah ne din intudtudun din o'ommoda. 15 At hiyaat un Ha"in an nidugah di abalinanan Diosyun holag Israel ya inali' di moltao' dida ta nidugah di punligligatanda ta paddungnay ipa'inum'un diday bininun mumpait. 16 At ipiyuy'u didah adadagwin babluy an agguy in'innilan din o'ommodda ya ta"on un dida. Ya honogo' goh di mi'buhul an titindalun mamatoy ay dida ta engganah unda mun'atoy an amin.”
17 Ya inalin goh Apo Dios di,
“Nomnomnomonyu daten ma'at
ta ayaganyu nan binabain nangipa'enghan mun'ebel hi un way matoy.”
18 Ya inalin nan tataguy,
“Ipa'innilayu mah ay dida ta punnaudondan umali
ta ibilan da'mi ta engganah un tumuduy lugwami!
19 At madngol di ahikikilad Jerusalem,
ya hay alyondah nan kumilaanda ya alyonday,
Nidugah ahan di napa"ian tun babluy tu'u!
Nunhegla mahkay ahan di nipa'ampaan tu'u ti nun'apa"iy a'abung tu'u!
At makulug an taynan tu'uh ten babluy!”
20 At ha"in an hi Jeremiah ya alyo' ay da'yun binabaiy,
“Ihamadyun donglon nan alyon Apo Dios
ta ituduyuh nan imbabaluyyun binabai ya nan liligwayu nan mikantah un way matoy!d
21 Ti ten dimmatong di atoy hitun babluy tu'u ya nan numpunhituwan tu'u,
at nun'a'atoyda nan ung'ungungngan lumaniwligwah nan kalata,
ya ta"on un nan ungungan linala'ih nan way plasah tun babluy tu'u.”
22 Ya hi Apo Dios ya inalinay,
“La'tot ya awakilat di mun'a'atoy ta ayda galut unu bento' an niwa'at,
ya mi'id di ma'angang hi mangilubu' ay dida.”
23 Ya inalin goh Apo Dios di,
“Nan nala'eng ya adina ipahiyay la'engna,
unu nan ma'abbi'ah an tagu ya adina ipahiya nan abalinana,
ya umat goh hinan adangyan an adina ipahiyay inadangyana.
24 Mu hay maphod hi ipahiyayu ya nan nanginnilaanyun Ha"in an Dios
ya nan abalinanyun manginnilah aat'u.e
Ti Ha"in an Dios ya ma'ulaya',
ya makulug di pangat'u,
ya nidugah di homo"uh nan tataguh tun luta ti hiyatuy pun'amlonga'.”
Hiyah ne hinapit Apo Dios.
25 “At ten ibaga' an magadyuh di pummoltaa' hinan tatagu an ta"on unda nakugit mu bo'on Ha"in di unudonda 26 an i'Egypt, ya i'Edom, ya i'Ammon, ya iMoab, ya nan numpunhituh nan mapulun, ya nan iJudah. An amin hanan tatagu ay danen abablubabluy ya paddungnay agguyda nakugit an numpapaddungda damdamah nan i'Israel ti bo'on nan Uldin'uy inunudda.”