6
Hay Angunuh hi Mipadan ad Jerusalem
1 Ha"in an hi Jeremiah ya inali' di,
“Ditu'un holag Benjamin ya lumayaw tu'u ta taynan tu'ud Jerusalem!
At ipagangohyuy talampet ad Tekoaa b ta panginnilaan nan tatagun na'uy di gumubat an malpuh appit hi iggid hi un hagangon di buhu'an di algaw.
Ya mun'apuy ayud Beth Hakkeremc ta nan ahu' di panginnilaand nan tataguh din na'uyday pumatoy an nalpuh appit hi iggid.
2 Ti alyon Apo Dios di,
Pa"io' ad Jerusalem an ta"on un umat hinan ma"apgohan an mangilog an babai.
3 At umaliday mi'buhul an a'ali ya nan tindaluda
ta mungkampudahe nan nunlene'woh ta li'ubondah den babluy.
4 At wadadah nan owon an pun'it'u' nan a'alih nan titindaludan alyonday,
Gubaton tu'ud Jerusalem hinan muntongay algaw unu hay mapuyaw!f
Mu mid mapto' ya ten maladaw tu'u ti na'uy an mahilip!
5 At pumpa"i tu'uh mahdom nan nun'ihamad an allupdah nan nunlene'woh eden babluy
ta iyal'allanan mi'id amtanda!g
6 Manu ay umat hinay ma'at ya hi Apo Dios an nidugah di abalinana ya alyonan daden tindaluy,
Munlongoh ayuh nan ayiw,
ya nun'u'uttunonyu ta engganah un meyengngoh hinan anata'nang nan allup ad Jerusalem ta way atonyun manggop ay dida.
Ti nan tataguh di ya nidugah an nappuhiy ato'atonda,
at hiyanan mamoltada.
7 Ti nan nun'appuhin ma'ma'at hidi ya umat hinan danum an malpuh nan obob an mi'id di duminngana
ti immannung an wadaday mumpapattoy eden babluy.
At an aminda nan tataguh di ya paddungnay waday hugatda unu dogohda.
8 At inalin Apo Dios di,
At hiyah te di angunuh hi itugun'un da'yu an iJudah
ti adiyu ay donglon ta adiyu ipaphod di ugaliyu, at du'go' h da'yu,
ya umannung an pumbalino' tun babluyyuh mapulun.
9 At hay ma'at ya pa"ion da'yuh nan buhulyu ta engganah un mi'id di ma'angang hi taguh nan babluyyu,
at umat hinan umuy mumpugah hi greyp an umuyna alegahhawon an alan an amin nan na'angang.”
Hiyah ne hinapit Apo Dios.
10 Ya tembal'un inali' di,
“Apu, inali' hinan tatagu nan pummoltaam ay dida,
mu undaat goh ab'abatlan an adida kulugon!
11 Ya ta"on un ha"in ya adia' pa"edpol hinan nun'appuhin ato'aton nan i'ibba' an tatagu.”
Ya inalin Apo Dios di,
“Hiya nongkay an ad ugwan ya ipa'dam'uy bungot'uh nan tatagu
ta miyuydah udum an babluy nan ung'ungungngan mun'ay'ayam hinan kalata,
ya nan ma'amu'amung an mumpangilog,
ya an amin nan numpunhimbaluy,
ya ta"on un nan nun'ala'ay ya nun'a'in'inna.
12 At nan buhulday mihukat hi a'abungda,
ya papayawda,
ya a'ahawadan binabai.
Ti Ha"in an Dios ya moltao' nongkay nan tatagun numbabluy hitu.”
Hiyah ne hinapit Apo Dios.
13 “Ti an aminda ya munhinkukulukda
an ta"on un nan nun'awotwot ya nan adadangyan,
ya ta"on goh un nan numbino'ob'on an propeta ya papadi ya umat goh hinay atonda.
14 Ti mi'id di badangdah nan tatagun nadamtan hi bahol,
at namama an paddungnay himmalom di hugatda.
Mu adida bagan dida ta du'gonda nan pumbaholan
ti undaat goh alyon di,
Malenggop tu'u aya!
Mu bo'on at aya lenggop di mawada ti nan gubat.
15 Ya gulat at ya bumainda mah hinan nidugah an baholda?
Mu mi'id ahan di nipattig hi bainda!
Hiyanan middumdah nan mun'a'atoy hitun pummoltaa' hinan tatagud Judah.”
Hiyah ne hinapit Apo Dios.
16 Ya inalin goh Apo Dios hinan tatagunay,
“Wada ayu ay hinan nunhappangan di dalani
ya hay alyo' ya unudonyu nan enengwan din o'ommodyuh din penghana
ti hiyah ne awadan di lumenggopanyu.
Mu adiyu pohdon.
17 Ya hennag'u goh di mumpapto' ay da'yu ta tugunon da'yu,
mu nihimung an adiyu pohdon an unudon nan inalida.”
18 At inalin Apo Dios di,
“Da'yun tataguh nan abablubabluy ya ihamadyun donglon
ta innilaonyuy ma'at hinan tatagu':
19 Din'uga' ay dida an adida pohdon an unudon nan Uldin'u.
At hiyanan honogo' di mamatoy ay dida
ta nan nappuhin ninomnomdah atonda ya diday a'atana.
20 Manu man ti e'nongyun Ha"in di incense an nalpud Shebaj
ya nan udum an nabanglun na'alah adagwin babluy.
Ya do'ol nan mun'onong hi Onong an Moghob an idawatyun Ha"in,
mu adi' abuluton ti adi umipa'amlong hanan onongyu.
21 At hiyanan Ha"in an Dios ya paddungnay ihawan'uh nan owonyuy
dumalat hi ihalipdudanyu ta magah ayu.
Ta matoy ayun amin an ta"on un nan o'ommodyu, ya imbabaluyyu,
ya nan heneggonyu, ya liligwayu.”
Nan Tindalun Malpuh Appit hi Iggid hi un Hagangon di Buhu'an di Algaw
22 Ya inalin Apo Dios ta alyo' goh di,
“Undan adiyu donglon an na'uyday titindalun malpuh adagwin babluy
hi appit hi iggid hi un hagangon di buhu'an di algaw an mangubat ay da'yu.
23 Dida ya mabungotda,
ya nundadaandan mamatoy ay da'yu
an mi'id di homo'dah malgom.
Ya nungkakabayuda ta hay madngol hi umalianda ya umat hinan munggongaah an dalluyun hinan baybay.
At daten titindalu nongkay di umalin mamatoy ay da'yun iJerusalem.”
24 Ya inalin nan tataguy,
“Dengngolmi di aat danen umalin gumubat
at hiyanan mangluy di odolmih ta'otmi!
Ya ahihaha'it di odolmin umat hinan doghon nan muntungaw an babai.
25 At hiyanan adi ami lumahun hinan na'allup an babluymi
unu umuy mundallanan hinan kalata.
Ti nidugah an atata'ot di awadanmi an nun'a'almasday buhulmi.”
26 Ya inalin goh Apo Dios di,
“Odolnah un ayu munlubung hi langgut,
ya nolo' ayuh nan awadan di dapul ta pangipattiganyuh punlungdayaanyu
ta paddungnay natoy di oh'ohhan imbaluyyu.
At kilaanyu nan umalian di pumatoy ti himbumagga ya himmawangda.
27 At he"a, Jeremiah, ya manu ay inali' hi ibagam hinan tatagu nan imbaga' ay he"a
ya ta innilaom hi unda unudon an paddungnay hinhinom dida
an umat hinan balitu' an mamahmahan ta innilaom di aatda.
28 Ti an aminda ya nidugah di ngohoyda,
ya umat hinan hapitondan puma"i ahan hi i'ibbada.
At na'alligatdan matudduwan an umatdah nan gambang ya gumo' an hemmelot di nomnomda,
ya nidugah di kulukda.
29 Ya umatda goh hinan silver
an ta"on hi un bimmala nan apuy ya adi malanat an mi'id hulbina
ti adi mahinhin nan nilamut an adi maphod an gumo'.
Ti nan tatagu' ya ta"on hi un atnay pummolta' ay dida
ya adida damdama du'gon nan nun'appuhin pangatda.
30 At hiyanan du'go' mahkay dida
ta umatdah nan mid hulbinan silver.”