64
1 Ya innayun'un nunluwalu an inali' di,
“Gulat ta ibughulmud abuniyan ya nun'ohop'ah tun luta at nunhegla
an ta"on nan aduntuduntug ya wumogwogdah ta'otda
2 an umat hinan danum an gun munluwag hinan way dumaladalang an apuy.
Mun'ohop'a nongkay ta way aton nan bubuhulmun Hentil an wumogwog
hi pangipattiggam hinan anidugah di abalinam!
3 Ti hidin immaliam hidin penghana ya waday inatmun umipanoh'an agguy na'at hidin hopapna
ya wimmogwog nan aduntuduntug.
4 Mi'id ahan ah ohah nangngol unu nannig hi Dios an umat ay He"a
ti He"a ya anggay di nahamad di pangipapto'nah nan tatagun
mangiyokod hi nitaguandan He"a.a
5 Ti nundadaan'an bumadang hinan tatagun ma"amlong an mangunud ay He"a
ya inatda nan pohdom.
Mu da'mi ya unmiat goh inaynayun an mumbahol,
at hiyanan nidugah di bungotmun da'mi!
At hay atonmi mah an mabaliwan?
6 Ti an amin ami ya umat amih nan na'aluggit an dumalat nan pumbahbaholanmi,
ya ta"on hi un nan alyonmih maphod an pangatmi
ya nipaddung hinan nidugah an agaga"ihaw.
At dumalat nan baholmi ya umat amih nan nalangun holo' an mun'iyaddib.
7 Ya mi'id goh ahan di ohah nunluwalun mumpabadang ay He"a.
At hiyanan din'ug da'mi an dumalat di baholmi.
8 Mu He"a damdama nongkay hi Amami!
Ti an amin ami ya He"ay nunlumu ay da'min paddungnay da'mi nan uklit,
ya He"ay mipaddung hinan munduwin.
9 At adi'a ni' ahan bumungot ay da'mi, Apo Dios!
Hom'on ni' da'mi ta adim u'unnungon di baholmi
ti da'miy tatagum nongkay,
at igohgohan ni' da'mi!
10 Nan do'ol an me'gonan an babluymu ya numbalin hi mapulun,
ya ta"on goh ad Jerusalem ya ninganuy an natawan.b
11 Ya din me'gonan an Timplu an gun nundayawan din a'apumi ay He"a ya nun'oghob,
ya an amin din mun'aphod an wah tun babluymi ya nun'apa"i.
12 Ya undan ta"on hi un umat hituy na'at ya adi da'mi haghaggungon?
Ya un mah ahan mid abalinam ta minaynayun di nidugah hi punholholtapanmi
an adi ami pa"edpol?”