55
Nan Iyal'alu' Apo Dios an Homo'na
1 Inalin goh Apo Dios di,
“Da'yun mumpanga'anamut ya umali ayun nun'a'uwaw ti wah tuy danum hi inumonyu!
Ya ta"on hi un mi'id di pihhuyu ya umali ayu
ta ummal ayuh ononyu ya inumonyun gatas ya bayah,
at mi'id di bayadna.
2 At bo'on nan adi bumhug di pangiyay'ayanyuh pihhuyu,
ya nan mi'id di balulnay umuyyu ibo'labo'laan.
At donglonyu ya inun'unudyu tun ibaga'
ta way atonyun mangan hinan ma"aphod an ma'an!
3 Umali ayun Ha"in ta Ha"in di donglonyu,
at waday pi'taguanyu!
Ya waday adi mapogpog an itulag'un da'yu
an da'yuy pangidata' hinan wagah an din intulag'un David.a
4 Undan adiyu tigon an numbalino' hiyahb ap'apuh abablubabluy?
At dumalat ay hiya ya nipa'innilah tataguy abalina'.
5 Ya awniat ipa'ayagyun amin nan tataguh udum an abablubabluy
an din agguy nangin'innilan da'yuh din hopapna.
At punnaudondan umalin middum ay da'yu
ti Ha"in an Diosyu an nan me'gonan ad Israel di mangat hi umat hina ta way a'al'alyanyu.”
6 At ha"in an hi Isaiah ya alyo' an immannung ay an hi Apo Dios di hapulon tu'u,
ya gulat ta mumpabadang tu'un Hiyad ugwan at donglon ditu'u.
7 Ya da'yun nun'appuhiy pangatna ya ipogpogyu hanan ato'atonyu ya punnomnomyu,
at hi Apo Dios an dayawonyuy pangedenolanyu,
at hom'o' da'yu ti Hiya ya nundadaan an mangaliw hi baholyu.
8 Ti inalin Apo Dios di,
“Nan punnomnom'u ya mi'id di nipaddunganah nan punnomnomyu,
ya umat goh hi pangat'u an adi umat hinan pangatyu.
9 Umat ad abuniyan an nabagbagtu ya un tun luta,
ya umat goh hinan pangat'u an agguy nipaddung nongkay hi pangatyu,
ya nan punnomnom'u ya na'ahhamad ya un nan punnomnomyu.
10 Nan hapit'u ya umat hinan udan ya dalallu an malpud dayan mun'agah
ta madanuman tun luta,
ta way aton an amin nan nitanom an tumubu,
ya ta malmuy itanom nan munhabal.
Ya malmuy ma'an ta way onon nan tatagu.
11 Ya umat goh hina nongkay di aat nan hapito'
an adida mumbangngad ay Ha"in.
Mu mahapul an ipa'annungdan amin nan pohdo' an ipa'at
ta atondan amin di dumalat hi nannaga' ay dida.
12 Ya umamlong ayun makak hinan babluy an immayanyu,
ya mi'id di al'alin da'yuh nan pangipakakandan da'yu
ti ta"on hi un nan aduntuduntug ya nan dudunduntug ya paddungnay umamlongda,
ya ta"on goh nan ayiw ya paddungnay tumalpu'da.
13 Nan ayiw an bolbol ya myrtle ya mihukatdah nan himmangawan nan do'ol an hubit.
Ya hiyah ne mangipanomnom hinan ina'inat'un Dios,
ya minaynayun henen panginnilaan an adi mapogpog hi enggana.”