35
Hay Umamlongan nan Nabaliwan
1 Nan mapulun ya paddungnay umamlongda
ti humabungda nan himmangaw hidi.
2 At do'ol di mattig hi habhabung hidi an ayda mungkantah pun'amlonganda.
At pumhod danen mapulun an umat hi ad Sharon,
ya nan munlangtan inalahan ad Lebanon,
ya nan pahtuh nan duntug hi ad Carmel.
At mattig hidi nan amaphod Apo Dios ya nan anabagtuna.
3 At ipa'innilayuh teh nan nakapuy ta bumi'ah di punnomnomanda,
ya mawaday denolda.a
4 Ya alyonyuh nan numanomnom ta pabi'ahonday nomnomda ta adida tuma'ot.
Ti undan adida tigon an hi Apo Dios an dayawon tu'u ya umali ta ibaliwna dida,
ya imballohna nan inat nan buhul tu'u?
5 Ya iyadaognay nun'abulaw ta mittig di matada,
ya umat goh hinan nun'apu'it ta medngol di ingada.b
6 Ya iyadaogna goh nan nun'apilay ta munlatlattu'dan umatdah nan ulha,
ya nan nun'awe'we' ya tum'u'dah amlongda.c
Ya malmu goh di danum ta umayuh hinan mapulun
7 ta nan lumahu an panag ya mumbalin hi lobong,
ya dumo'ol goh di obob hinan mamagan lutan paddungnay na'uwaw.
Ya hinan mapulun an awadan nan do'ol an animal an jakal ya malmuy holo' ya nan atlubong.
8 Ya mawaday kalatan mumpa'uy hidih nan mapulun an ma'alih Dalan an Me'gonan,
mu adi mabalin an e'wan nan nun'appuhiy ugalinah di an adi umunud ay Apo Dios
ti ammuna nan umunud ay Apo Dios di mabalin hi mange'wah di.d
9 Ya mi'id goh di layon unu nan udum an atata'ot an animal hi umuy hidi,
at hay mange'wah di ya anggay nongkay nan binaliwan Apo Dios.
10 Ya nan paddungnay penla'na an umanamut hi ad Jerusalem ya mungkankantadah pundayawdan Hiya,
at amlong mahkay di wan didah enggana
an adida mahkay numanomnom ya munlungdaya.