31
Hay Pamaliwan Apo Dios ad Jerusalem
1 Mahmo' ayun i'ibba' an umuy mumpabadang hi ad Egypt
an bo'on at goh hi Apo Dios an dayawon tu'un holag Israel!
Ti hay pundenolanyu ya nan mahapul hinan pi'gubatan an umat hi kabayu,
ya kalesa,
ya nan abalinan di nungkakabayun titindaluda.
2 Mu nidugah an nala'eng hi Apo Dios!
At hiyanan inilanay atona,
at ipa'alinay punholholtapan nan i'ibban nun'appuhiy pangatnan iJudah
an umuy an mumpabadang hinan i'Egypt.
Ya henen atona ya makulug an ipa'annungna ti Hiya ya adina itutuyuy
inalinah amoltaan daten nun'appuhiy pangatdan tatagu.
Ya ta"on un nan i'Egypt an pundenolanda ya pogpogona goh damdama dida.
3 Ti nan i'Egypt ya unda tagu ya anggay an bo'onda Dios hi pundenolan,
ya ta"on un nan kabayuda ya mi'id di nun'abhiwandah nan udum an kabayu
ti wada goh di odolda an bo'onda lennawa.
Ya wa ay ta bumungot hi Apo Dios at mapa"i nan mabi'ah an babluy an gun bumadang,
ya ta"on nan babluy an gunna badangan at ma'ubahdan duwa.
4 Mu umat hituy inalin Apo Dios ay ha"in an inalinay,
“Ta"on hi un ahitutu'u' nan mumpumpahtul an mangabul hinan layon
mu adida tuma'ot an undaat goh inaynayun an gun mangih'ihdah nan animal.
Ya umat goh hinay ma'at an mi'id ah ohah way abalinanan mangipawan Ha"in
an mangibaliw hinan Duntug an Zion.
5 Ya umat goh hinan panalimunan nan hamutih nan buyana ta baliwana nan imbaluyna
ya umat hinay ato' an Dios an nidugah di abalina' an mamaliw hi ad Jerusalem.”
6 Ya inali' an hi Isaiah di, “Da'yun holag Israel ya ta"on hi un nidugah di numbaholanyun Apo Dios mu ad ugwan ya muntutuyu ayu ta mumbangngad ayu ta Hiyay dayawonyu. 7 Ti madatngan henen algawa at an amin ayu ya pun'itapalyu nan inyammayu an bululyu an balitu' ya silver. 8 Ti inalin Apo Dios di,
Awniat mun'apatoy nan buhulyun i'Assyria,
mu bo'on nan hanggap di tataguy mumpamatoy ti Ha"in an Dios,
at hiyanan mumpangalayawdah nan punggugubatanda,
ya nan ungungan linala'i ya makaphulda ta mumbalindah himbut.
9 Ya ta"on un nan a'ap'apun di titindaluda ya nidugah di tuma'tanda,
at taynanda nan bantilada.
Ha"in an Dios an ma"abnang di benangnad Jerusalem di nanapit ete.”