28
Hay Ma'at hi ad Samaria
1 Mahmo' nan maphod an babluy ad Samaria an kapitulyud Israel
an wah nan nundotal ya malumong an luta!
Ti ta"on hi un ipahiyan nan mabubutong an a'ap'apu tu'un holag Israel
ya mapa"i an ay ma'leng hinan ma"aphod an habhabung.
2 Ti tigonyu an ipa'alin Apo Dios nan mun'abi'ah an gumubata
an umat hi aton di mabi'ah an puo' ya udan,
at wa ay ta mundatong ya nun'iyanudnan amin di dalapuhona.
3 At henen babluy an ipahiyan nongkay nan mabubutong an holag Ephraim
ya pa"ion di buhul.
4 At mami'id mahkay di amaphodna
ta umat nongkay hinan ma"aphod an habhabung
an ta"on hi un nitanom hinan ma"aphod ya malumong an luta,
mu mun'ulay damdama ya na'leng.
Ya umat goh hinan nanahhun an nalum an bungan di ma'alih fig
an un himbumagga ya mami'id ti alan di mannig,
ya inanda.
5 Mu hitun alpahan di a'atan hana ya hi Apo Dios an nidugah di abalinana
di nahamad hi iyamlong nan ma'angang an tataguna.
6 Ti tigona ta nepto' di aton nan mangipanuh hi tatagu,
ya idatnay abalinan nan tatagunan mananggah nan mangubat ay dida.
Nan Mabubutong an Propetah ad Judah
7 Mu ad ugwan ya nan papadi ya propeta ya mabubutongda,
at munlangngiwandan dumalan,
at mi'id poto' di nomnomda,
at mun'ibahhaw di pun'awatdah nan ipa'innilan Apo Dios ay dida,
at mibahhaw di atondan mangipanuh hinan tatagu.
8 Ya mun'iwa'at di inutadah nan lamehaan,
at nidugah an aluluhnin ya ahi'a'agub.
9 Ya inalida goh udot ay ha"in di,
“Hay punnomnom nin nen tagun ditu'u?
Ti wa ay ta humapit ay ditu'u ya ay tu'u ung'ungungnga!
10 Ti nan hapitona ya nan hapit di nun'abutong an alyonday,
Bada, bada, bada, bada!
Bada, bada, bada, bada!”b
11 At umat hina ay an ngohoyona' an muntudun didan i'ibba' an holag Israel
ya la'tot ya impa'alin Apo Dios nan buhul an nat'on di hapitdac
ta diday manugun ay da'yud ta abakon ditu'u,
ta diday muntudun ditu'u.
12 Mu gulat ta donglon daten i'ibba' an holag Israel nan Tugun Apo Dios
at immannung an hitun babluy tu'uy punhituwan tu'u,
mu nihimung an nangohoyda.e
13 At hiyanan hi Apo Dios ya umat goh hinay atonan alyonay,
“Bada, bada, bada, bada an muntudtudun da'yu ta ohha'ohhaona!”
At hiyanan mun'ihupdugda,
ya nahugatanda ta nalakan alanda dida,
ya inyuyda didah udum an babluy.
14 At donglonyun mumpungngohoy an a'ap'apud Jerusalem nan hapit Apo Dios
15 ti ita"engyun alyonyuy un ayu ni'tulag hi atoy ya nan lubu'.f
At hiyanan ta"on hi un waday nunnaud an ligat
ya alyonyuy mibaliw ayu an gapu ta mundenol ayuh layah.
16 Mu nan na'abbagbagtun Dios ya inalinay,
“Nomnomnomonyu an impognad'u nan batuh nan Duntug an Zion,
at nan tagun mangedenol enen batu ya adi mabainan.g
17 Ti dida ya nahamad di pangatda,
mu nan pundenolanyun layah ya pun'iyanud di datong ya dalallu,
18 at nan ni'tulaganyuh atoy ya mid hulbina.
Ti hitun umalian nan buhul ya umannung an mun'iwalitang ayuh luta
an paddungnay iyanud da'yuh datong
19 an dumalat nan punligligatanyuh abigabigat.”
Ya un gulat ta ma'awatanyuh te at umannung an matuduwan ayu,
at mawaday nidugah hi ta'otyu.
20 Ti adi ayu mabaliwan
an umat ayuh nan ulgud an nan mun'ammah he'he'dod an kama an malauh di hu'inah nan kama,
ya umat goh hinan limma'uh ho'ho'dod an uloh an adi umdah iyulohna.h
21 Ya wan hi Apo Dios ya mahanawang an nidugah di boholna,
at hay atonan ditu'un tataguna ya umat hi inatnah nan iPhilistia hinan Duntug an Perazimi
ya hinan holag Amor hinan nundotal ad Gibeon.j
At atona nan umipanoh'an pummoltanah nan tataguna
an ta"on hi unda adi ma'awatan.
22 At maphod hi unyu ipogpog di ngohoyyu ta adi mamamay moltayu!
Ti inalin Apo Dios an nidugah di abalinana ay ha"in di makulug
an pa"iona tun babluy tu'u.
23 At donglonyu tun alyo' ay da'yu
24 ti undan way mumpayaw hi unna inanayun an umala'aladu
unu kumawakawal hinan payawna?
25 Ti wa ay ta nidadaan nan puntanomana ya tinammanah nan pohdonan itanom,
at ilahhinay pangitammanah nan wheat, ya nan barle, ya nan dill, ya nan cummim.
26 Nan mumpayaw ya inilanay atonan muntamu
ti hi Apo Dios di mangipanomnom hi atona.
27 Ti nabto' ay nan umat hinan dill ya cummin ya inilanan bo'on hay gumo' di panaltalna
ti nan maymayappaw an ayiw di usalona.
28 Ya umat goh hinan mabto' an wheat an inilanay atonan manaltal ta adi magmi'.
At mabalin an usalona nan pilid di kalesa an guyudon di kabayu,
mu tigona ta adi magmu' di bogahna.
29 Ya an amin hatun la'eng di tagu ya nalpun Apo Dios an nidugah di abalinana
ti Hiya ya ma"aphod di panuguna ya nanginnila!