19
Hay Nipa'innilah Ma'at ad Egypt
(Jer. 46:2-28; Ezek. 29:1-32:32)
1 Hiyah te nipa'innilan ha"in an hi Isaiah hi ma'at hi ad Egypt.
Awniat amangonyuh Apo Dios an niddum hinan bunut
an mabi'ah an mumpa'uy ad Egypt.
At nan bubululdah di ya wumogwogdah ta'otdan Hiya,
at inyal'allanah nan tataguh di.
2 Ya inalin Apo Dios di,
“Punggugubato' nan i'Egypt ta un didaan numpapattoyda.
At mumpapattoyda nan hina"agi,
ya umat goh hinan nuntutunglub.
Ya nunggugubatda nan naheghegon an babluy hidid Egypt,
ya ta"on un nan a'alidah di ya punggugubato' dida.a
3 At malulugluy nomnomda ti bahibaho' nan ninomnomdan aton.
At mumpumbagadah badang hinan bululda,
ya nan lennawan di natoy,
ya nan mumpumbuyun,
ya nan mumpunhapud.
4 Ya iyabulut'u didah nan ap'apun mabungot ya mata'tan an alib
ta paligligatona dida.
Ha"in an hi Apo Dios an nidugah di abalinanay nanapit ete.”
5 Ya matdu' nan Wangwang an Nile,
at mun'anga'.
6 At mun'atdu' goh an amin nan ala' ya ginnaw hidid Egypt,
at ahi'a'agub ya ma'leng nan atlubong ya holo',
7 ya an amin nan numpangahangaw hinan pingit di Wangwang an Nile.
Ya nan nun'atamman an papayaw an neheggon hinan wangwang ya mun'anga'da,
at la'tot ya mun'a'ubahda.
8 Ya hana ay an mumpanidu' hinan wangwang
ti hiyah ne pangngalandah itanudda ya numanomnomda,
at munlungdayada.
9 Ya umat goh an ma'a'amuyan nan mumpunlubid hi damuy an ma'alih flaxc
ya nan mumpun'obol hi lo'ob an linen.
10 Ya an aminda nan mumpun'ammah lubung ya nan mi'bo'bo'la
ya nidugah di lumungdayaanda.
11 Ya nan ap'apud Zoand ya mun'awe'we'da ti mibahhaw di itugundah alida.
Mu mumpahiyada damdamah nan alin alyonday,
“Nala'eng ami an umat amih din o'ommodmin a'ap'apuh din penghana.”
12 Mu uggoh mah di la'engdan muntugun ay he"an ali?
Gulat ta nala'engda at ibaagda mah di ninomnom
nan nidugah di abalinanan Dios an ma'at hi ad Egypt!
13 Mu hanan a'ap'apud Zoan ya ad Memphise ya nun'awe'we'da nongkay
ti pimmuhi din maphod an nomnomda,
ya mid poto' di punnomnoman nan a'ap'apud Memphis.
Ti un gulat at diday nahamad an baliw hinan numbabluyanda,
mu bo'on ti un at goh diday lummuh apa"ian ad Egypt!
14 Ti hi Apo Dios ya ulawona dida
ta way ohaan mibahhaw di itugunah nan tatagu.
At hiyanan mi'id di baindan mangat hi malgom an pumbaholan an ayda nun'abutong.
15 Ya mi'id ay didan i'Egypt di way abalinanan bumadang
an ta"on hi un nan adangyan unu nawotwot,
ya ta"on goh hi un nabagtuy ataguna unu na'ampa.
16 Ya heden pummoltaanf nan nidugah di abalinanan Dios hinan i'Egypt ya mami'id di tulidda. At nidugah nongkay di wogwogdan lumungtuydah ta'otda. 17 At un anggay di pangngolandah nan ngadan an Judah ya nidugah di ta'otdan gapuh nanginnilaandah pummoltaan Apo Dios ay dida.
18 Ya henen agtudana ya lemay babluy ad Egypt di mabalin hi humapit hi Hebrew,g ya nan nidugah di abalinanan Dios di un'unudonda. Ya ohan danen babluy di nangadnan hi Babluy di Algaw.h
19 Ya wada goh di iyammadah nan gagwan ad Egypt hi pun'onngan hi me'nong ay Apo Dios. Ya mipata'dog goh han panginomnomandan Apo Dios hinan pingit di babluy. 20 At hiyah ne pangimmatunan nan tatagun bumadang nan nidugah di abalinanan Dios ay didad Egypt. At wa ay ta mumpabadangdan Hiyah nan ipaligligatanda ya waday honogonah mamaliw ay dida. 21 Ya hi Apo Dios ya ipa'innilanay aatnah nan i'Egypt, at mabalin an abulutondan Hiyay immannung an Dios hi dayawonda. Ya pun'iyuyda mahkay di e'nongdan Hiya. Ya wada ay di ibagadan Hiyah atonda ya ipa'annungna. 22 At moltaon Apo Dios nan i'Egypt, mu badangana goh damdama didah umangunuhna. Ti muntutuyudah nan gunda aton an pumbaholan, at Hiya an Dios di pumpabadanganda, ya donglona, ya ipaphodna dida.
23 Ya henen a'atana ya waday kalatan mipalpud Egypt ta engganad Assyria. At nan i'Assyria ya mabalin an umuydad Egypt, ya umat goh ay didan i'Egypt an mabalindan umuy ad Assyria. At nan i'Assyria ya i'Egypt ya ohay Dios hi dayawondan amin.i 24 At middumda goh hinan i'Israel ta mumbalindah wagah hinan tataguh tun luta. 25 Ti wagahan goh Apo Dios didan alyonay, “Wagaha' da'yun tatagu' an i'Egypt, ya da'yun limmu' an i'Assyria, ya da'yun pento"uh tatagu' an holag Israel.”