6
Hay Namto'an Apo Dios ay Isaiah hi Propeta
1 Ha"in an hi Isaiah ya tinnig'uh Apo Dios eden tawon an natayan din Alin hi Uzziah.a Hiya ya inumbun hinan ma"aphod an umbunan di ali an na'abbagtu. Ya nan gayadan di lubungna ya hinophopana nan dotal di Timplu. 2 Ya hinan bagtun di inumbunana ya wadaday seraphimb an nahin'o'nom di paya'da. At nan duwa an paya'da ya nanophopdah angahda,c ya nan duwa ya nanophopdah hu'ida, ya nan duwa an paya'da ya hay usalonda an tumayap. 3 Ya pi'eng'enggandan mungkantan gunda pidwon an alyon di,
“Me'gonan hi Apo Dios!
Me'gonan hi Apo Dios!
Me'gonan hi Apo Dios!d
Anggay Hiyah na'ahhamad di aatna,
ya nidugah di abalinana!
Ya ma"attig hi an amin hitun lutay amaphodna!”
4 Ya gapuh nan gunda panglotan an mungkanta ya niwogot nan Timplu, ya namaag, ya napnuh ahu'.
5 Ya inali' di, “Ammuna ni'! Makulug an matoya' ti nabaholana', ya nappuhiy hinapit'u! Ya ta"on hi un nan i'ibba' an holag Israel ya nabaholanda goh! Ya wan numpattig ay ha"in nan Ali an Hiya nan nidugah di abalinanan Dios!”e
6 Ya hin'alina ya immalin ha"in nan ohan anghel an intayapna han balan ini'ipitna an innalnah nan way pun'onngan. 7 Ya endenehnah pingit di timid'u nan bala, ya inalinay, “Nedeneh heten balah timidmu, at mid mahkay di baholmu ti na'aliwan an amin.”
8 Ya dengngol'uy hapit Apo Dios an inalinay, “Hay honogo' nin ta umuyna ipa'innila nan penhodminf innilaon ay danen tatagu?”
Ya tembal'un inali' di, “Apu, ha"in di honogom ta umuya'.”
9 Ya inalinay,
“At umuy'a,
mu hay alyom hinan tatagu ya alyom di,
Ta"on hi unyu donglodonglon di Hapit Apo Dios
mu nihimung an adiyu ma'awatan.
Ya gunyu tigon goh nan ma'ma'at,
mu agguyyu inilay pohdonan ipa'innila.g
10 At paddungnay pa'odholom di punnomnomda ta adida ma'awatan,
ya paddungnay hophopam di matada ta adida pa"attig.
Ya upupom goh di ingada ta adida dumngol
ta mi'id di atondan umunud ay Ha"in ta adida mipaphod.”h
11 Ya minahmaha' an inali' di, “Apu, anuud mah di alpahan ten ma'at?”
Ya inalinay,
“Engganah un mun'apa"i nan babluy ta mi'id di munhitu,
ta mabukawan nan a'abung,
ya ninganuy nan apayapayaw.
12 Ti Ha"in an ap'apu ya ipiyuy'u nan tataguh nan nun'iyadagwin babluy
ta taynandad Judah.
13 Ya ta"on hi un way ohah ma'angang mu magubatda goh damdama,
at umatdah nan ayiw an nalngoh an un anggay di tungodnah ma'angang.
Mu ta"on hi un umat hina an mipaddungdah nan tungod di ayiw
mu la'tot ya humapeng goh damdama.”i