16
1 Hay tagu ya mabalin an hiyay okod an munnomnom hi ato'atona,
mu gahin damdamay un iyabulut Apo Dios ya un mipa'annung an ma'at.
2 Hay punnomnom di tatagu ya nahamad an amin di ato'atonda,
mu hi Apo Dios ya hamadonay pangatdah un maphod unu nappuhi.
3 At hay mahapul hi atonda ya e'koddan amin ay Apo Dios nan nomnomondah atonda,
at umannung an ma'at.
4 Hi Apo Dios ya ninomnomnay ma'at an amin hinan limmuna,
ya hay ninomnomnah ma'at hinan tatagun nun'appuhiy pangatda ya nan a'ubahanda!
5 Boholon Apo Dios nan tagun mangipabagtuh odolda,
at umannung an moltaon Apo Dios dida!
6 Wada ay di pamhodmu ya iyulaymuh nan i'ibbam, at mabalin an aliwanday baholmu,
ya gulat ta e'gonam hi Apo Dios at mi'id ah nappuhiy ma'at ay he"a.
7 Wa ay ta nan pangat di ohan tagu ya umipa'amlong ay Apo Dios
at ta"on nan binuhulna ya maluman di nomnomda ta ma'ulaydan hiya, ya mid al'alin dida.
8 Od'odolnah un itang di pihhun nan tagu mu ta nahamad di na'alana
ya un nan do'ol di pihhu an agguy nahamad di na'alana.
9 Ta"on hi un way abalinan nan tagun munnomnom hi ato'atona
mu hi Apo Dios damdamay okod an mangiyabulut hi un ma'at henen ninomnomnan aton unu adi.
10 Nan mandal di ali ya mibilang hi mandal Apo Dios ti hiyay baal Apo Dios an mumpapto',
at ma'ahhapul an adina ipangngel di ipanuhna.
11 Hi Apo Dios ya pohdona ahan nan nepto' an pungkilu ya punlukud hinan mingina
ta mapapaddung an amin di la'uda.
12 Umipabohol hinan a'ali nan numbino'ob'on hi pumbaholan
ti immannung an hay nahamad hi aton an mangipanuh hinan tatagu di mangipabi'ah hinan pumpapto'anda.
13 Umipa'amlong hinan a'ali nan immannung an hapit,
ya pohpohdonda goh nan tagun adi munlayah.
14 Umipata'ot hi un mabungot nan ali ti abalinanan mangipapatoy hi tagu,
mu nan tagun nanomnoman ya ephodnan mangal'alu' ay hiya ta mabayuyay bungotna.
15 Ti nan maphod an ipattig nan ali
ya umat hinan udan an taguonay nitanom hinan tiyalgaw.
16 On'onaynah un nan tagu ya nanomnoman ya nala'eng
ya un nan ado'ol di pihhuna unu balitu'na!
17 Nan tagun nahamad di pangatna ya bata'anana nan nappuhih nan ay kulhan dalanona
ti nan mangipapuut hi umayana ya hay odolnay hinalimunana.
18 Nan pumbagtuan di tagu ya immannung an lummuh a'ubahana,
ya nan tagun munnomnom an hiyay na'abbagbagtu ya un nan i'ibbanan tagu ya immannung goh an lummuh ipa'ampaana.
19 Onaynah unta nawotwot ya mumpa'ampa ya mi'hituh nan nawotwot
ya unta mi'bingay hinan mumpumbagtun taguh nan hinamhamda.
20 Nan tagun mangihamad an mangunud hinan nitudun hiya ya maphod di pumbalinana,
ya umat goh hinay ma'at hi unna e'kod di nitaguanan Apo Dios ti mawagahan.
21 Nan nanomnoman an tagu ya hiyay way abalinanan manginnilah nan na'alligat,
ya gulat goh ta ma'ma'ullay di puntuduna at ma'ud'udman di pangipabagtuandan hiya.
22 Nan nanomnoman an tagu ya umat hinan obob an adi matmatdu' ti idatnay amaphodan di nitaguan,
mu mi'id hulbin nan puntudtuduwan nan tagun nakudang di nomnomna.
23 Nan nanomnoman an tagu ya pa'annomnomonah mahhun di alyona ya un humapit,
at hiyaat un ma"aphod hi pangngolan nan tataguh nan ituguna.
24 Nan ma'ma'ullay an panapit ya ay alig an munlameeh hi pangngolan,
at ipabi'ahnay nitaguan.
25 Nan udumnan tagu ya hay nomnomonda ya maphod di nitaguanda,
mu hay umangunuhna ya milahhindan Apo Dios hi mi'id pogpogna.
26 Nan ahinaangan di dumalat hi pangibi'ahan nan bumo'lan muntamu,
at mahmahlun muntamu ta adi munhinaang.
27 Nan tagun nappuhiy ato'atona ya un hay pi'bohholanay an'anapona,
ya umat goh hinan hapitona an ay apuy an gumhob.
28 Nan tagun nappuhiy pangatna ya ihudhudolnay nappuhih aat di ibbanan tagu ta way atonan miwa'at,
ya hiyay dumalat hi gulu, ya pa"ionay nahamad an punggagadyumanda.
29 Nan tagun gun mi'papattoy ya balbaliyanay heneggona ta middum ay hiyan mangat hi nappuhi.
30 Nan tagun komod'eng hi ibbana an ta"on hi un adi humapit
mu waday ninomnomnah atonah nappuhi.
31 Waday pulimyun nan nala'ay an tagun nahamad di ataguna
ti hiya ya na'ubanan di buu'na an umat hinan ma"aphod an uklup di ali.
32 Onayna nan tagun ma'ma'ullay ya un nan mabi'ah an mangam'ameh hinan himpapangili,
ya onayna goh nan tagun mangedpol ta adi mabanbannungot ya un nan mangabak hinan babluy.
33 Ta"on hi un ditu'uy ad nomnom hinan aton tu'u
mu hi Apo Dios damdamay okod an mamto' hi ma'ma'at.