11
1 Nidugah di pamoholan Apo Dios hinan agguy nepto' di pungkilunah nan way ila'una,
mu mun'am'amlong hi un nahamad di kiluan nan mungkumildu.
2 Hay ma'at hinan tagun mangipabagtuh odolna ya mipa'ampah awni,
mu nan tagun mumpa'ampa ya hiyay nanomnoman.a
3 Gapu ta maphod di ugalin nan nahamad an tatagu at adida mibahhaw hinan ato'atonda ti nan maphod an ugaliday mangituduh atonda,
mu gapu ta nappuhiy pangat nan adi mangngol at hiyay dumalat hi apa"ianda.
4 Nan inadangyan ya mi'id ah ibadangnah nan gutud di punhumalyaan Apo Dios hinan tataguh tun luta,
mu nan anahamad di tagu ya wada ahan di ibadangna ti hiyay mangibaliw ay hiyah mi'id pogpogna.
5 Nan ugalin di tagun nahamad di pangatnay dumalat hi pumhodan di ato'atona,
mu nan ugalin di tagun nappuhiy pangatnay dumalat hi gun apa"ian nan planuna.
6 Immannung an nan nahamad an pangat nan taguy dumalat hi abaliwana,b
mu nan tagun nappuhiy ugalina ya paddungnay na'nah hulu an dumalat nan a'amnawana.
7 Wa ay ta matoy nan nappuhiy pangatna at mi'yatoy goh an amin di planuna,
ya ta"on an amin nan namnamaonah ma'at an dumalat nan numbino'ob'on an abalinana.c
8 Nan tagun maphod di pangatna ya hiyay mibaliw hi gulu
ta nan tagun nappuhiy pangatnay a'atana ta awahna.
9 Nan ulgu'ulgudon nan tagun mid diosnay mamuhih nan heneggona,
mu nan nahamad an tatagun nanomnoman ya diday mabaliwan.
10 Wa ay ta maphod di ma'at hinan tagun nahamad di pangatna ya mun'am'amlong nan ni'babluyana,
ya wa ay goh ta matoy nan tagun nappuhiy pangatna ya ibugawday pun'am'amlonganda.
11 Ya wa ay ta nan nahamad di pangatday munwagah hinan babluy at pumhod,
mu nan ulgu'ulgudon nan nibahhaw di pangatday dumalat hi apa"ian nan babluy.
12 Nan tagun nakudang di nomnomna ya pahalonay ni'tunglubna,
mu nan tagun nanomnoman ya ane'nongonay hapitona.
13 Nan tagun ma"ulgud ya wa ay di dengngolnaan immuyna inulgu'ulgud,
mu nan tagun nanomnoman ya adina ibabbaag nan na'alin adi mipa'innila.
14 Gulat ta mibahhaw di aton nan mumpapto' hinan tatagu at ma'abakdah un way gubat,
mu wa ay di do'ol hi mumbabaddangan an muntugun hinan mumpapto' at immannung an diday mangabak.
15 Nan tagun mangita'dog hinan umutang hinan tagun agguyna in'innila ya muntutuyuh umangunuhna,
mu nan adi mangabulut an mangita'dog hinan umutang ya mi'id al'alin hiya.
16 Nan babain ma'ma'ullay ya e'gonan nan tatagu hiya,
mu nan linala'in atata'ot ya ammunay inadangyanday wan dida.
17 Nan lala'in ma'ma'ullay ya hay odolnay binadangana,d
mu nan malmaligit an lala'i ya un hay nitaguanay pinuhina.
18 Nan bino'lan di mangamangat hi nappuhi ya un na'amtang ya na'ubah,
mu nan bino'lan di mangamangat hi maphod ya immannung an waday hulbina.
19 Nan tagun manginaynayun an mangat hi maphod ya pumhod di nitaguana,
mu nan manginaynayun an mangat hi nappuhi ya un hay atayanay ah'upana.
20 Boholon Apo Dios nan tagun agaga"ihaw di nomnomona,
mu umipa'amlong ay Hiya nan tagun makulug di pangatna.
21 Nan tatagun hay nappuhiy gunda aton ya umannung an moltaon Apo Dios dida,
mu nan nahamad di pangatda ya mabaliwanda.
22 Nan ma'amnawan ahan an babai ya mi'id di hulbin nan amaphodnah un agguy nanomnoman
an hay ipaddungan di amaphodna ya umat hinan hengheng an balitu' an nihulit hinan hungahung di babuy.
23 Hay gamgamon nan maphod an tagu ya maphod di pumbalinana,
mu nan nappuhiy pangatnan tagu ya mi'id di hulbin an amin di namnamaona an un nan nidugah an bungot Apo Dios di mamannod ay hiya.
24 Nan udum an tatagu ya mun'am'amlongdan umidat hinan mibadang hinan i'ibbada mu ta"on ya ma'ud'udman di inadangyanda damdama,
mu wadada goh di udumnan ukuhandan umidat hi badangda mu gun miyal'allay awotwotanda.
25 Nan tagun mabanbanadang ya pumhod di nitaguana
ti immannung an nan bumadang hi ibbanan tagu ya hiya goh di mabadangan.
26 Idutan nan tataguy mangipo"oy hi bogahnah un way batel ta awni ta nguminay la'una ya unna ukaton,
mu mawagahan nan tagun mamhod an mangila'un dida.
27 Nan tagun hay maphod an ma'at di anapona ya maphod goh di ma'at ay hiya,
mu nan tagun hay nappuhiy anapona ya hay nappuhi goh di ma'at ay hiya.
28 Nan tagun hay inadangyanay pangehdolana ya umat hinan nalangun tubuh nan tiyalgaw an magah,
mu nan tagun nahamad di pangatna ya hiyay nonongnah mawagahan, at umat hinan mumballun tubuh nan lawang.
29 Nan tagun hay pamilyanay gunna guluwon ya mi'id ah punhulbianah umangunuh
ti hiya ya nakudang di nomnomna, at mumbalin hi baal nan nanomnoman.
30 Nan maphod an aton nan nahamad di ugalina ya umat hinan maphod an bungan nan ayiw an dumalat nan pi'taguan,
ya nala'eng nan tagun gun mangal'alu' hinan i'ibbanan tagu ta way atondan mabaliwan an mi'tagun Apo Dios.
31 Gulat ta hi Apo Dios ya idatnay lagbun nan maphod di pangatnan tagu ad ugwan an awadanah tun luta
at nidugah ahan di pummoltaanah nan nabaholan an tagun nappuhiy pangatna.e