142
Hay Inluwalun David hidin Awadanah nan Liyang
Heten psalm ya maskila an inluwalun David, ya intudo'nah din nipo"oyanah nan liyang.
(I Sam. 24:1-22)
1 Mumpahpahmo'a' ay Apo Dios ta badangana',
2 ya ibaag'un Hiya an amin di diklamu' ya nan punligligata'.
3 Wa ay ta mi'id di poto' di punnomnoma' ya wadah Apo Dios an mangituduh ato' ta mabadangana'
ti indadaan nan buhul'uy bitun a'naa'.
4 Muntiggatiggawa',
mu mi'id ahan di bumadang ya mangibaliw ay ha"in hi humalimun!
5 At mumpahpahmo'a' ay He"an alyo' di,
“Apo Dios, He"ay mangibaliw ay ha"in,
ya He"a ya anggay di mahapul'uh nitagua'!”
6 At donglom ni' ahan tun luwalu' ti ten mahmo'a',
ya ibaliwa' hitun aton tun buhul'u ti mabi'bi'ahda ya un ha"in!
7 Pabi'ahom di nomnom'u ta adi minaynayun di punligligata' ta way ato' an mundayaw ay He"a.
Wa ay ta ma'at di umat hina at nan tatagum an mangun'unud ay He"a
ya middumdan mi'yam'amlong ay ha"in an dumalat nan amaphodmun ha"in.