140
Hay Pamaholan David hinan Buhulnaa
Hete ya psalm an intudo' David, ya hay intud'ana ya nan ap'apun di muntudtuduh kanta.
1 Apo Dios, baliwana' ni' ahan hinan tatagun nappuhiy ugalidan unda hay pumatpatoy!
2 Dida ya numomnonomnomdah engganah nappuhin atonda,
ya diday mamahhun hi dumaladalat hi pumpapattayan di tatagu.
3 Nan hapitonda ya umat hinan gitan di ulog an pumatoy,
ya umat goh hinan gitan di ipi'ipit.b
4 Apo Dios, baliwana' ahan hinan nappuhin aton di tatagun pumatopatoy
ti pohdonda ahan an patayona'!
5 Hanan mumpumpahpahiyan tatagu ya paddungnay nun'idadaanday huluh a'naa',
ya ta"on un malgom di aya' ya wah di nan nun'idadaandan a'naa'.
6 Apo Dios, alyo' di,
“He"ay Dios'u!”
At donglom ni' ahan di luwalu' an mumpahpahmo' ay He"a!
7 Apu an na'abbagbatun Dios an nidugah di abalinana
an namaliw ay ha"in hidin gun'u ni'gubatan,
8 adim ni' iyabulut an ma'at di pohpohdon nan nun'appuhiy ugalidan tatagu,
mu unmuat pa"ion nan ninomnomdan aton
ti gulat ta umannung hanan ninomnomda at mumpahpahiyada!
9 Pumbalinom an diday a'atan nan nun'appuhin ninomnomdah pama"idan ha"in,
10 ya ogohom didah nan apuy unu ogohom didah nan bitun ma'alluhung
ta mid abalinandan bumuhu'!
11 Ya pumbalinom an adi ma'at di ninomnom nan mumpabahol hi layah hi ibbada,
ya hanan pumatpatoy ya hana ni' an nun'appuhin ato'atonday mama"in dida!
12 Apo Dios, inila' an He"a ya badangam nan mipaligligat,
ya halimunam nan nun'awotwot.
13 At immannung an dayawon da'ah nan un'unnud ay He"a,
ya mimiddumdan He"a!