135
Nan Kantan Pundayaw ay Apo Diosa
(Psa. 115:4-6, 8-11)
1-2 Mipabagtuh Apo Dios!b
An amin ayun baalna ya da'yun mumpuntamuh Abungna
ya hinan dolah nan Abungna ya dayawonyuy ngadana!
3 Ipabagbagtu tu'uh Apo Diosc ti Hiya ya ma"aphod,
ya ikantayuy pundayawyuh ngadana ti Hiya ya ma'ulay.
4 Ti pento'nay holag Israel an imbilangnan tataguna,
ya dida goh di paddungnay na'ahhamad an gamongna.d
5 Inila' an na'abbagbagtuh Apo Dios an Ap'apu tu'u
ya un nan udum an madayaw.
6 Atonan amin di pohdonah aton ad abuniyan,
ya hinan luta, ya hinan baybay, ya ad dolom.
7 Iyalinay bunut an ilpunah pingit tun luta,
ya ipa'alinay ilat an middum hi udan,
ya ipabuhu'nay dibdib an ilpunah nan nihinanda.
8 Pinatoynan amin nan papangpangullun imbabaluy nan tatagud Egypt
an ta"on nan nun'ahhun an imbabaluy di a'animalda.e
9 Inatnad Egypt di umipanoh'a ta pummoltanah nan ali ya nan tatagu,f
10 ya nun'amehna nan do'ol an tataguh nan abablubabluy,
ya numpatoyna din a'ali an nidugah di abalinanda.
11 Umat ay Sihon an alin nan holag Amor,g
ya hi Og an alid Bashan,h
ya an amin nan a'alid Canaan.i
12 At indatnah nan tatagunan holag Israel di numbabluyanda
ta hiyanay ma"aphod an banohda.
13 Apo Dios, mipa'innila ta engganay anabagbagtum hi an amin hinan tatagu,
an ta"on un hinan mahayhaynod an holagda ya mundongol di ngadanmu.
14 He"a, Apo Dios, ya baliwam ya hom'on di tatagum an baalmu.
15 Nan bulul di Hentil ya un hay inyamman di tagun hay silver ya balitu' di nahibug.j
16 Ya waday timidda ya matada,
mu adida humapit,
ya adida tummig.k
17 Ya waday ingada,
mu adi medngol,
ya mi'id di yahyahda.l
18 Ya hanan gun mangiyamma ya mundenoldan danen bulul
at mumbalindah umat ay dida.m
19 Da'yun holag Israel ya ipabagbagtuyuh Apo Dios,
ya da'yun papadina ya dayawonyu goh Hiya!n
20 Ya da'yun holag Levi ya ipabagbagtuyuh Apo Dios,
Ya da'yun ipa'anhanay pangatanah nan pohdon Apo Dios ya ipabagbagtuyu goh Hiya damdama!o
21 Ipabagtuyuh Apo Dios ad Zion ya ad Jerusalem an babluyna!
Mipabagbagtuh Apo Dios!p