132
Hay Mikantah nan Punti'idan ad Jerusalema
Hiyah te kantan ingkantan nan Hudyun din nunti'idandan numbiyahen immuy ad Jerusalem.
(II Chron. 6:41-42)
1 Apo Dios, nomnomom hi David
ya ta"on an amin nan hinolholtapna.
2 Ya adim goh aliwan nan inhapatanan He"an Ap'apu
an nidugah di abalinanan Dios Jacob an inalinay,
3 “Adia' umanamut,
ya adia' goh umuy an mali'li'uh an mun'eblay,
4 ya adia' molo'
5 ta engganay un'u bohwaton di ihinam an Ap'apu
an nidugah di abalinanan Dios Jacob.”b
6 Wada amid Bethlehem Ephrathahc
ya dengngolmi an umuymi alan nan Kahon an Nittuwan di Uldin Apo Dios hinan payaw ad Jaar.d
7 At inalimiy,
“Umuy tu'uh Abung Apo Dios ta umuy tu'u mundayaw ay Hiya!
8 At Apu, umali'ah tuh nan balbalun ihinam,
ya mi'yali'ah nan Kahonmun attigan di nidugah an abalinam ta mihina'ah tuh enggana!e
9 Maphod ni' hi engganay aton nan papadim,
ya mungkanta ni' nan tatagum an dumalat di amlongda!”f
10 Adim ni' ahan du'gon hi David an baalmu
an pento'mu an mun'ap'apuh nan tatagum.g
11 Immannung an inhapatam ay David an inalim di,
“Ha"in an hi Apo Dios ya awniat pumbalino' hi Aliy ohan holagmu
ta Hiyay mun'ap'apu an umat ay he"a,h
12 ya gulat ta punnonngon di holagmun unudon din ni'tulaga' ay he"a,
ya gulat goh ta unudonday Tugun'u
at munnononnong an hay holagmuy manginaynayun an mun'alih enggana.”i
13 Umat hituy inalin Apo Dios ti pento'nay Zion an ihinanan inalinay,
14 “Hituy pohdo' hi ihina' hi enggana!
Hituy pohdo' an pun'ap'apuwan!
15 Wagaha' heten babluy an Zion ta umadangyan goh
ya ta adi makudangan nan nawotwot hi ma'an.
16 Ya wagaha' nan papadih tu ta waday abalinandan mangipa'innilah nan tataguy aat di pamaliwa' ay dida.
Nan tatagu ya awniat mungkantada ya muntu'u'da an dumalat di amlongda.
17 Idat'uy abalinan David an mun'ap'apuh tu,
ya nan pot'o' hi udum di algaw an mun'ali ya mipaddung an hilaw hinan tatagu.j
18 Ipabagtu' nan pot'o' hi mun'ali,
mu nan buhulna ya pumbalino' didah mababainan.”