127
Hay Kantan Solomon an Mikantah nan Punti'idan ad Jerusalema
Hiyah te kantan intudo' Solomon an ingkantan nan Hudyuh din nunti'idandan numbiyahen immuy ad Jerusalem.
1 Adi ay bumadang hi Apo Dios hinan malgom an aton an umat hi pangiyamman hi abung
ya mi'id di hulbin di benlay nan nangiyamma.
Ya umat hina goh hinan babluy an wa ay ta adi ipapto' Apo Dios
ya mi'id hulbinah pangiya'adugan enen babluy.
2 Ya umat goh an mi'id di hulbina an ta"on hi un nidugah di puntamuan an punheglaon ta itutu'al an dumalat ahan di ma'an hi un adi bumadang hi Apo Dios.
Ya manu ay ya idatna tuwaliy mahapul nan tatagunan pa'appohpohdona an ta"on hi unda adi tumutu'al.
3 Nan imbabaluy ya wagah an indat Apo Dios,
4 ya hay linala'in imbabaluy di ohan taguh nan ataguna ya paddungnay diday panana.
5 At mawagahan nan tagun do'ol di imbabaluyna ti paddungnay do'ol di panana
ta adi ma'abak hinan pi'gubatanah nan buhulna!