121
Hay Mikantah Punti'idan ad Jerusalema
Hiyah te kantan ingkantan nan Hudyuh din nunti'idandan numbiyahen immuy ad Jerusalem.
1 Intigaw'uh nan dudunduntug,
ya inali' hi nomnom'uy,
“Un nin dan way bumadang ay ha"in?”b
2 Mu inila' an badangana' ay Apo Dios an nunlumud abuniyan ya luta!
3-4 Ya ta"on un da'yu ya badangan da'yu ay Hiya ta ma'ippapto' ayu
ti Hiya ya adi molmollo',
ya adi mabmablay,
ya nidadaan an mangipaphod ay ditu'un holag Israel.
5 Hi Apo Dios di manimung an mangipapto',
ya wagwagdan mun'adug ay ditu'u
6 ta mi'id di ma'at ay ditu'uh nan mapatal ya hinan mahdom.
7 Hi Apo Dios di mamaliw ay ditu'un amin hinan atata'ot an ma'at ta mipapto' tu'uh enggana,
8 ya immannung an ta"on un malgom di awadan tu'u ya ipapto' ditu'un Hiyah enggana!