115
Nan Immannung an Diosa
(Psa. 135:15-20)
1 Apo Dios, bo'on da'mi madayaw,
mu He"a ya anggay!
Manu ay ya munnononnong di pamhodmu ya nan pumpapto'mun da'mi!
2 Anaad ta alyon di Hentil hinan udum an babluy di,
“Hay wadan mah nan Diosyu?”
3 Hiya an Dios ya wah did abuniyan,
ya atonan amin di pohdonan aton.
4 Hay bulul di udum an babluy
ya un hay inyamman di tagun hay silver ya balitu' di nahibug.b
5 Ya waday timidda ya matada,
mu adida humapit,
ya adida tummig.c
6 Ya waday ingada,
mu adi medngol,
ya mi'id di yahyahda.d
7 Ya manu ti waday ngamayda, mu adida dumapa,
ya manu ti waday hu'ida, mu adida dumalan,
unu gumangoh mah ni' di alugu'ugda.
8 At an amin ni' nan mange'kod ya mangiyammah nan umat hina
ya mumbalindah umat ay danen bulul!e
9 At maphod hi un ditu'un holag Israel ya hi Apo Dios di pange'kodan tu'u
ti Hiyay bumadang ay ditu'u,
ya Hiyay paddungnay hapiaw tu'u.f
10 Ya da'yun holag Aaron an papadi ya mahapul an hi Apo Dios di pange'kodanyu
ti Hiyay bumadang ay da'yu,
ya Hiyay paddungnay hapiawyu.g
11 Ya da'yun mange'gon ay Apo Dios ya mahapul an Hiyay pange'kodanyu
ti Hiyay bumadang ay da'yu,
ya Hiyay paddungnay hapiawyu.h
12 Nonomnomon ditu'un Apo Dios ta wagahan ditu'un holag Israel,
ya ta"on goh nan holag Aaron an papadi.
13 Ya wagahanan amin nan un'unnud ay Hiya
an nun'abagtu unu nun'a'ampa an tatagu.
14 At maphod ni' hi un da'yu punhologon ay Apo Dios ta dumo'ol ayu,
ya ta"on goh nan imbabaluyyu.
15 At wagahan ni' da'yun Apo Dios an nunlumud abuniyan ya tun luta!
16 Ad abuniyan ya bagin Apo Dios,
mu tun luta ya indatna ta bagin an amin nan tatagu.
17 Bo'on nan nun'atoy di mundayaw ay Apo Dios
ti immuydah nan wadan di nun'atoy.
18 Mu ditu'un matagu di mundayaw hi enggana ay Apo Dios!
Madayaw hi Apo Dios!i