111
Hay Pangipabagbagtuan ay Apo Diosa b
1 Madayaw hi Apo Dios!c
Munyamana' hi ongol ay Apo Dios hinan wadan di a'amungan nan tatagunan un'unnud ay Hiya.
2 Ya mun'aphod an amin nan do'ol an inat Apo Dios,
at nan umanla ay dida ya nonomnomondah enggana.
3 Ya an amin di atona ya na'ahhamad ya me'gonan,
ya nan amakulug di aatna ya minaynayun hi enggana.
4 Ya adina iyabulut an ma'aliwan nan mun'aphod an inatna
ti Hiya ya ma'ma'ullay ya ma'ahhimo'.
5 Ti idatnay tanud nan mange'gon ay Hiya,
ya adina goh al'alliwan nan intulagna.
6 Ya impattigna nan nidugah an abalinanah nan tatagunan Hudyuh
din nangipaboltananan didah nan lutan di udumnan tatagu ta bagida.
7 An amin di atona ya adi mibahhaw ya nahamad,
ya an amin nan Uldina ya nahamad hi ma'unud.
8 Ya danen Uldina ya makulug ya nahamad,
ya minaynayun hi enggana.
9 Ya inatnay mahapul an atona ta mabaliwan nan tatagunah nan nihbutanda,
ya minaynayun hi engganay pi'tulaganan didah pumhodanda.
Me'gonan Hiya ahan ya madayaw di ngadana!
10 Hay pange'gonan ay Apo Dios di almuwan di anomnoman,
ya an amin nan mangunud hinan Tuguna ya manomnomanda.
Hi Apo Dios di madayaw hi enggana!