103
Hay Aat nan Pamhod Apo Dios
Hi David di nangitudo' eten psalm.
1 Nahamad an malpuh tun puhu' di pundayawa' ay Apo Dios,
ya an amin di abalina' ya ulgudo' di anabagtun nan ngadana!
2 Ya Hiyay immannung hi dayawo',
ya adi' aliwan an amin di inatnan ha"in!
3 Ti inaliwanan amin di bahol'u,
ya iyadaognan amin di dogoh'u,
4 ya Hiya goh di mangibaliw ay ha"in ta matagua',
ya adi malumluman di pamhodna ya homo'nan ha"in.
5 Ya an amin nan mahapul'uh tun atagu' ya indatna,
at hiyaat un heten a'unga' ya mabi'aha' an umat hinan agila.
6 Hi Apo Dios ya nahamad di panumalyana an adi mipangngel,
at adi mipangngel di mihumalyah nan mipaligligat.
7 Ya impa'innilanan Moses nan pohdonah atonda,
ya impattignah nan holag Israel nan nidugah an abalinana.
8 Hi Apo Dios ya nidugah di homo'na,
ya ma'ma'ullay,
ya adi mabanbannungot,
ya adi mapogpog nan pamhodna.
9 Ya ihingal ditu'u,
mu adina itugtuga,
ya adi goh minaynayun di bumubungtana.
10 Ya wa ay ta moltaon ditu'uh nan pumbaholan tu'u ya miyane'nong
an adi mipaddung hinan aat di bahol tu'u.
11 Ti hay pamhod Apo Dios hinan tagun waday ta'otna ya mundayaw ay Hiya ya nidugah
an adi mabalin an malukud an umat hi inata'nang di ad dayah tun luta.
12 Ya umat goh hinay inatnan nangaliw hi bahol tu'u ti inaana ya intapalnah nan pa"adagwi
an umat hi inadagwin nan buhu'an di algaw ta nangamung di alimuhana.
13 Ya hay ama'ma'ullay Apo Dios hinan un'unnud ay Hiya
ya umat hinan ama'ma'ullay nan ommod hinan imbabaluyna
14 ti inilanay aat tu'un hay lutay nalpuwan tu'u.
15 Nan nitaguan tu'uh tun luta ya he'he'dod an umat hinan holo',
ya umat tu'u goh hinan habhabung hinan bubulung an un na'amtang ya nalyaw,
16 ya immali nan tuyup,
ya inyaddibna ta na'utaw,
at mi'id di pangitiganda,
at ma'aliwandah enggana.
17 Mu nan tatagun hi Apo Dios di ita'otda ya unudonda ya minaynayun di pamhodnan dida,
ya atona goh hinan mahayhaynod an holag di imbabaluydah
18 unda unudon nan Uldina,
ya atonda goh nan intuguna.
19 Ya hidid abuniyan di nangihamadan Apo Dios hi ihinanan mumpapto',
at hiyanan Hiyay ap'apun an ami'amin!
20 At da'yun a'anghel ya ulgudonyu nan a'al'alyan Apu tu'u,
ya da'yu goh an mun'abi'ah an un'unnud hinan imandalna ya donglonyuy alyona!
21 Ya da'yun udum an wad abuniyan ya hapitonyu goh di a'al'alyan Apu tu'u,
ya da'yun mangat hinan ipatamuna ya unudonyuy alyonan da'yu!
22 Ya an amin ayun limmuna ya ul'ulgudonyuy a'al'alyana
an ta"on hi un malgom di wadanyuh nan babluy!
At hiyanan ha"in ya pi'yulgud'uy a'al'alyan Apo Dios!