86
Hay Luwaluh Pun'adawan hi Badang
Hete ya luwalun David.
1 Donglom ni', Apo Dios, ta tabolom tun luwalu' ti mid abalina',
at mahapul'uy badangmu.
2 Halimunana' ta mid ma'at ay ha"in ti un'unnuda' ay He"a,
at baliwana' ti ha"in an baalmu ya He"ay pange'koda' an Dios'u.
3 Hom'ona' ni', Apu, ti ten abigabigat ya gunna' munluwalun He"a.
4 Idatmu ni' di amlong'u, Apu, ti He"ay pange'koda' hi nitagua'.
5 O Apu, He"a ya ma"aphod di aatmu,
ya nidadaan'a an mangaliw hi bahol,
ya nidugah di pamhodmun amin hinan munluwalun mumpabadang ay He"a.
6 Ihamadmu ni' ta donglom tun luwalu', Apo Dios,
ya atom ni' nan iyal'alu"uh pun'adawa' hi badangmu.
7 Ya He"ay gun'u pumpabaddangan hi un way nappuhih ma'at ay ha"in
ti inila' an abulutom nan ibaga'.
8 Immannung an mi'id ahan hinan udumnan dios di umat ay He"a, Apu,
ya mi'id ah oha ay didah mangat hi umipanoh'a an umat hinan inatmu!
9 Ya an amin nan atagutaguh tun lutan limmum ya munhippidan mundayaw ay He"a, O Apu,
ya ulgudonday ahaphapitam
10 ti anggay He"ah nidugah di abalinanan mangat hi umipanoh'a,
ya He"a ya anggay di immannung an Dios.
11 At itudum, O Apu, nan aatmun ha"in ta nan immannung an itudum di hiyay unudo',
ya badangana' ta un'unnuda',
ya waday ta'ot'un He"a.
12 Ti nalpuh tun puhu' tun hapito' an a'al'alyam, Apu an Dios'u,
ya ulgudo' di ahaphapitam hi enggana
13 ti nidugah di pamhodmun ha"in,
at ten binaliwana' ta matagua'.
14 O Apo Dios, daten tatagun mumpabagtu ya ten buhulona',
ya nan adi mangngol ya patayona',
ya danen tatagu ya adida pohdon an innilaon di aatmu.
15 Mu inila', Apu, an He"ay Dios an ma'aggohgoh ya ma'ahhimo,
ya adi'a ag'agan bumungot ti nidugah di pamhodmu,
ya adim ibahhaw nan inalim.
16 At haggungona' ni', ya hom'ona', ya idatmuy bi'ah'u an baalmu,
at baliwana' an lala'in imbaluy di babain baalmu.
17 Ya ipattigmuy panginnilaan hinan amaphodmun ha"in ta mabainanda nan tatagun mamohol ay ha"in
ti He"a, O Apo Dios, di namadang ya nangal'alu' ay ha"in.