77
Hay Pangal'alu'an Apo Dios Hinan Maliligatan
Heten psalm ya kantan intudo' Asaph, ya hay intud'ana ya hi Jeduthun an ap'apun di muntudtuduh nan kanta.
1 Inhamad'un nunluwalu, Apo Dios,
ya enlot'u ta way atom an mangngol ta badangana'.
2 Ya hidin maliligatana' ya nunluwalua' ay He"a,
ya intata'nang'uy ngamay'un den limmanablabin limmuwaluwalua',
mu tagwan an adi ahan lumenggop di nomnom'u.
3 Ya wa ay ta ninomnom da'a, Apo Dios, ya munlilia',
mu unat goh ato' hene ya ma'abak di nomnom'u.
4 At ten unna' timmu'al an agguy'u ahan inim'imit,
ya nidugah di lungdaya',
at unna' pumeggepeggeng,
hiyanan mid inat'un nunluwalu,
5 ta omod un'u ninomnom'u din numbino'ob'on an mun'aphod an na'at hidin nadnoy.
6 Ya heden nahdom ya kimmantakantaa' ya nanginomnoma' hitun ma'ma'at hi ad ugwan ya inali' hi nomnom'uy,
7 “Undan inaynayunmu, Apo Dios, an gun manginganuy ay ha"in?
Unna' mah adi ahan igohgohan ay He"a?
8 At hiyah te mah di pogpog nan adi malumluman an pamhodmun ha"in?
Ya unmu mah goh adi ipa'annung din intulagmu?
9 Un mah inaliwam an Dios nan nidugah an homo'mu?
Ya un mah nan bungotmuy dumalat hi nangipogpoganah nan ama'ahhimo'mu?”
10 Ya intuluy'un nunnomnom, ya inali' mah di,
“Hay nonomnomo' ahan ya nan punnononnongan Apo Dios an na'abbagbagtu!”
11 At adi' al'alliwan din ina'inatmu, O Apo Dios,
an din umipanoh'an gunmu inat hidin nadnoy,
12 ya ten adi ma'ma"aan hi nomnom'u dade nan ina'inatmu,
ya gunda mipapanomnom hi enggana.
13 O Apo Dios, He"a ya na'ahhamad di pangatmu,
ya mi'id ah udum hi dios an nipaddung ay He"an Diosmi!
14 Ti He"a ya anggay di way abalinanan mangat hi umipanoh'a,
ya impattigmuh nan tataguh nan abablubabluy di aat nan nidugah an abalinam,
15 ya binaliwam nan tatagum an nan holag da Jacob ay Joseph
an dumalat nan bi'ahmu ya nan nidugah an abalinam.
16 Ya unat goh paddungnay tinnig da'ah nan danum, O Apo Dios, ya nidugah di ta'otda,
ya ta"on nan mun'aluhung an baybay ya womogwogdah ta'otdan He"a.
17 Ya hemmelong nan bunut,
ya enlotnay udan,
ya gun mun'idul ad daya,
ya gun umila'ilat goh,
18 ya pimmuo' an niddum hidin gunna umidulan,
ya gun benangan nan ilat an amin tun luta,
ya immalyog tun luta.
19 Ya ene'wam hinan baybay,
at indalanmuh din danum an nidugah di dalluyuna ta bimmad'ang'ah nan dammangna,
mu adi mattig nan gopa'mu,
20 ya impangulum nan tatagum an umat hi kalnilu,
mu da Moses ay Aaron di nanalimun ay dida.a