75
Hi Apo Dios di Munhumalya
Heten psalm ya kantan intudo' Asaph, ya hay intud'ana ya nan ap'apun di muntudtuduh kanta, ya hay tunena ya “Adiyu Pa"ion.”
1 Munyaman amin He"a, Apo Dios,
ya gunmi ibaag di aat di abalinam ya nan nidugah an umipanoh'an ina'inatmu!
2 Ya inalim di,
“Waday gintud'uh punhumalyaa',
ya nahamad ya ma'andong di panumalya'.
3 Ya wa ay ta umalyog tun luta ya wumogwog nan tataguh ta'otda
mu halimuna' nan pognad tun luta ta munnonong.
4 Ya alyo' hinan mungngoy di,
Ipogpogyun mumpahiya!
Ya alyo' goh hinan nun'appuhiy ugaliday,
Adiyu ipahiyay abalinanyu,
5 ya adiyu nomnomon hi un ayu nabagtu ya un Ha"in,
ya ipogpogyu nan malgom an hapihapitonyu.”
6 Immannung an nan munhumalya ya adi malpuh nan buhu'an di algaw,
unu hinan a'unugan di algaw,
unu hinan mapulun
7 ti anggay hi Apo Dios di munhumalya,
at okod Hiyan mangipanuh hi un numbahol di tagu unu agguy.
8 Ya inodnan Apu tu'uy howo' an mangipa'innilah panumalyaanah nan mangamangat hi nappuhi,
ya henen howo' ya napnuh nan na"apgot an bayah an hiyah ne bungotna.
Ya ihiitna ta inumon an amin nan tatagun nun'appuhiy pangatnah engganay un matidtidan.
9 Mu ha"in ya gun'u ipa'innilay aat di amaphod Apo Dios,
ya gun'u ikantay anabagbagtuna an Dios an nan dinayaw din hi Jacob.
10 Ya ipadah'uy abalina' an mamogpog hinan abalinan nan tatagun nun'appuhiy pangatda
ti kulugo' an udman Apo Dios di abalinan nan tatagun umunud ay Hiya.