72
Luwaluh nan Alia
Hi Solomon di nangitudo' eten psalm.
1 Apo Dios, iluwalu' an ituduwam nan ali ta nahamad ya mapapaddung di panumalyana
an miyunnudan hinan pangatmu.
2 Ya ta nahamad di pun'ap'apuwanah nan tatagum
an namamah nan mahmo' an tatagu
3 ta pumhod ya umadangyan nan babluy
ti dumalat nan maphod an pangat nan ali.
4 At badangam nan ali ta mapapaddung ni' di panumalyanah nan nun'awotwot an tatagu,
ya ibaliwmu nan imbabaluyda,
ya punholtapom nan mangipaligligat ay dida.
5 Ya minaynayun ni' di pangipapto'muh nan tatagum an un'unnud ay He"a
an umat hinan punnonngan nan bulan ya algaw.
6 Ya pumbalinom nan ali an mabmabadang
an umat hi aton nan udan an bumadang hinan nitanom hitun luta.
7 Ta henen gutud di pun'ap'apuwana ya mun'aphod di ugalida,
ya hay lenggop di mawada ta nangamung di apogpogan nan bulan.
8 Ya mumpapto' Hiya an mete"ah nan pingit di baybay ta engganah nan pingitna goh,
ya mete"a goh hinan Wangwang an Euphrates ta engganah nan pogpog di luta.
9 Ya ta"on nan numpunhituh nan mapulun ya mumpunhippidan mange'gon hinan ali,
ya umat goh hinan buhulna an mumpunluungdan mange'gon ay Hiya.
10 Ya nan a'alid Tarshish ya hinan adadagwin babluy ya umidatdah adawdah nan ali,
ya umat goh hinan a'alid Shebab ya ad Sebac an umidatdah adaw nan ali.
11 At an amin nan a'ali ya munhippidan mange'gon ay Hiya,
ya an amin nan Hentil hinan abablubabluy ya Hiyay punhulbianda.
12 At baliwana nan agogohgoh an tataguh unda mumpabadang,
ya umat goh hinan ninganuy an mi'id ah mamadang ay dida.
13 At hom'ona nan mid abalinana ya nan nun'awotwot,
ya baliwana dida ta mi'id ma'at ay dida.
14 Ya baliwana didah nan way mangipaligat ya mamatoy ay dida
ti nidugah an nabalul di nitaguandan Hiya.
15 Ya ud'udmam di ataguana ta matubayan Hiya!
Ya idatan ni' nan iSheba Hiyah nan balitu'da,
ya iluwaluan goh ni' nan tatagu Hiya,
ya gun ni' goh mawagahan.
16 Ya wagaham nan nihabal hinan dudunduntug ta malumongda,
ya dumo'ol di bungada an umat hinan ayiw ad Lebanon.
Ya dumo'olda goh nan tataguh nan babluy
an umat hinan ado'ol di holo' hitun luta.
17 Ya minaynayun ni' hi engganah nen ali an adi ma'aliwan di ngadana
an umat hinan patal di potang an munnonong.
Ya an amin nan Hentil an wah nan abablubabluy ya mawagahandan Hiyay dumalat,
at an amin nan tataguh tun luta ya e'dawanda Hiyan Apo Dios ta wagahanda Hiya.
18 At ipabagbagtu tu'uh Apo Dios an Dios nan holag Israel
ti anggay Hiyah way abalinanan mangat hinan umipanoh'a!
19 Ya mipabagtu nan ngadanah mi'id di pogpogna,
ya mipattig ni' di anabagtunah an amin hitun luta.
Amen! Ipidwa' an mangalih, Amen!
20 Hiyah ne angunuh hi luwalun David an hina' Jesse.d