61
Luwaluh Pumpabaddangan hi Abaliwan
Hete ya psalm an intudo' David, ya hay intud'ana ya nan ap'apun di muntudtuduh kanta, ya mahapul an matukalan hinan instrumenton way gadengna.
1 Donglom ni' di luwalu', Apo Dios, hi pumpahpahmo'a'
2 ti ta"on hi unna' umuy hinan adagwin babluy ya gunna' damdama munluwalun He"a
ta mumpabadanga' hi un mid abalina',
at ipangulua' ta iyuya' hinan lugal an mid al'alin ha"in.
3 Ti He"a ya anggay di gun'u ihi'ugan
ti He"ay umat hi nihamad an ata'nang an pun'adugan an mangibaliw hi buhul.
4 Iyabulut mu ni' ahan an mimidduma' ay He"ah nan Timplum hi mid pogpogna
ta baliwana' an paddungnay hophopana' hinan paddungnay paya'mu.
5 Ya dengngolmun amin din inhapata' hi ato', Apo Dios,
ya indatmun ha"in nan mipabnoh hinan tatagun mange'gon ay He"a.
6 Ya udmam di pi'taguan nan ali ta do'ol di holag hi ipaluhna,
7 ya badangam ni', Apo Dios, hiya ta minaynayun di pun'ap'apuwana,
ya halimunam hiyah nan nidugah an pamhodmu ya nan amakulugmu.
8 At gun'u ikantay ipabagbagtuam,
ya ipa'annung'u din intulag'u an gunna' mun'onong hi abigabigat ay He"a.