57
Hay Luwaluh Pumbabaddangan
Heten psalm ya miktama an intudo' David hidin limmayawanah nanaynanan Saul ta immuy hinan liyang. Ya hay intud'ana ya nan ap'apun di muntudtuduh kanta, ya hay tunena ya “Adi Pa"ion.”
(I Sam. 24:1-22; Psa. 108:1-5)
1 Hom'ona' ni', Apo Dios, ta igohgohana'
ti He"a ya anggay di pumpabadanga' ta mihania' hinan ay paya'mu,
at halimunana' ta engganay un malpah hanan atata'ot an ma'ma'at!
2 Ya He"an Dios an na'abbagbagtuy gun'u pumbagan
ti He"ay mangidat hi an amin an mahapul'u.
3 Ya donglom hinad abuniyan an awadam di luwalu' ta ibaliwa' hinan mangubat ay ha"in,
ya abakom dida ta pangipattigam hinan munnananong an pamhod ya nan pangipapto'mun ha"in.
4 Ya ten lini'uba' hinan mangi'ingol ay ha"in an umatdah layon an uman hi tagu,
ya mun'atadom nan babada an ay papana ya gagayang,
ya nan dilada ya umat hinan matadom an hinalung.
5 Ipattigmuy anabagtum, Apo Dios, hinad abuniyan
ya nan a'e'gonam hitun alutalutab
6 ti indadaan nan buhul'u nan huluda ta pangnadan ha"in,
ya ten nidugah di ta'ot'u.
Ya nunluhu'da goh hi pamitudan ha"in,
mu didaat di nun'abitu.
7 Mundenola' ahan ay He"a, Apo Dios,
at ikanta' di pundayaw'un He"a.c
8 Ya gunna' midadaan an mangipagangoh hinan alpa ya lyred
ta tukalo' hi engganay mawa'ah.e
9 Ya ipabagbagtu' He"a, Apo Dios,
ya ikanta' di punyamana' ay He"ah nan a'amungan di tatagu.f
10 Ti nan nidugah an pamhodmu ya nan panalimunmun ha"in
ya mitu'dud hi ad abuniyan.g
11 Ipattigmuy anabagtum, Apo Dios, hinad abuniyan
ya nan a'e'gonam hitun alutaluta!h