38
Hay Luwalun nan Tagun Maligligatana
Heten psalm ya luwalun intudo' David ay Apo Dios.
1 O Apu, adia' ni' ihingal unu titildon hinan bumungtam
2 ti paddungnay pinanaa' ya tinubli'a'.
3 Ya dumalat nan bungotmu ya ten nidugah di dogoh'u,
ya ten ahihaha'it an amin di alimatung di odol'un dumalat nan bahol'u
4 ti nidugah ahan an umat hinan ma'addamot an adia' pa'appi'ug.
5 Ya nalipuh tun odol'uh pogha,
at ahi'a'agubda an dumalat nan adi maphod an inat'u.
6 Ya ten unna' pumi"upi"ut'ut hi ha'itna,
ya abigabigat ya umale'alengenga',
7 ya ten nidugah an munha'it di bonog'u
ti dumalat nan nidugah an dogoh'u.
8 Ya ten mangluya' ahan an mid am'amungit hi bi'ah'u,
ya umale'alengenga' ti adia' pa"edpol hitun dogoh'u.
9 Apo Dios, inilam an amin di wah nomnom'u,
ya immat hinan umungi'ungiya',
10 ya umob'o'ob'ob di puhu',
ya munlunglungtuya',
ya ta"on tun mata' ya ma'unabbaan an adi mittig.
11 Ya dumalat heten dogoh'u ya adia' idungaw hinan liligwa' ya nan ni'tunglub'u ti tuma'otda.
12 Ya hanan mamhod an mamatoy ay ha"in ya inyammaday pamitudan ha"in,
ya hanan mama"in ha"in ya adida idinong nan nappuhin ninomnomdah atondan ha"in.
13 Mu unna' ay napu'it an adi' donglon nan pana'ta'atotdan ha"in,
ya paddungnay unna' goh natumum an unna' didindinong.
14 Ti onaynah un'u adi donglon ya tabolon di alyondan ha"in.
15 Mu He"ay pundenola', Apo Dios,
ti inila' an He"ay bumadang ay ha"in.
16 Ti hay inluwalu' ya inali' di,
“Adim ni' abuluton an abatlana' hinan buhul'u,
unu adim ni' goh iyabulut an umamlongdah nan way nappuhin ma'at ay ha"in!”
17 Ya ten paddungnay matu"ina' ti ten adi duminong nan ligat'u,
18 at itutuyu' tun bahol'u ti hiyay mangipaligligat ay ha"in.
19 Ya do'ol nan mun'abi'ah an buhul'un mamohol ay ha"in
an ta"on un mi'id ah dumalat,
20 ti ta"on un maphod di inat'u mu nappuhiy pamallohda ti nan nahamad di ato'.
21 Apo Dios, adia' ni' ahan inganuy,
ya adia' ni' du'gon ay He"an Dios'u,
22 at punnaudom ni' an mamadang ay ha"in, O Apu an Baliw'u!