28
Hay Luwaluh Pun'adawan hi Badang
Hi David di nangitudo' eten psalm.
1 Apo Dios an paddungnay batun punhi'uga', He"ay punluwalua',
at donglom ni' tun ibaga' ti gulat ta adim aton at la'tot ya natoya',
at midduma' hinan nun'ilubu'.
2 At donglom ni' nan pumpahmo'a' hi badangmuh pangita'nanga' hi ngamay'u
an munluwaluh appit di Timplum.
3 Ya adia' ni' itagam an pi'moltah nan ahilalayah,
ya nan mangamangat hi nappuhi,
ya nan ay ma'ma'ullay di panapitdah nan heneggonda mu hay wah nomnomda ya bumobohholda.
4 At moltaom dida ta balloh nan gunda inat an nappuhi ya nan anappuhin di inatday pummoltam ay dida!
5 At dumalat nan adida pangulugan hinan ina'inatmu, Apo Dios, ya nan limmum
ya hiyanan ubahom didah munnananong!
6 Idaydayaw da'a, Apo Dios, ti dengngolmuy luwalu' hi pumpabaddanga' ay He"a.
7 Immannung an He"ay mangidat hi bi'ah'u,
ya He"ay paddungnay hapiaw'u,
ya heten nitagua' ya He"ay ehdol'u,
at hiyanan binadangana',
ya nidugah di amlong'u,
at ikanta' di punyamana' ay He"a.
8 Ya He"a goh di mangidat hi bi'ah nan tatagum,
ya He"ay mamaliw ya manalimun hinan alin pinilim.
9 At ibaliw ya wagahan da'min tatagum an holag Israel,
ya He"ay paddungnay mumpahtul hi mangipapto' ay da'mih enggana.