20
Hay Luwaluh Umabakan
Hete ya psalm an intudo' David, ya hay intud'ana ya nan ap'apun di muntudtuduh kanta.
1 Hi Apo Dios ni' di bumadang ay he"ah nan gutud di aguguluwam,
ya Hiya ni' an Dios Jacob di mamaliw goh ay he"a.
2 Ya hidih nan Timplunah nan Duntug an Zion ya Hiya ni' di bumadang ay he"a.
3 Ya olom ni' ya nomnomonan amin nan ene'nongmun Hiya,
ya namama ni' an umamlong hinan Onong an Moghob an ene'nongmun Hiya.
4 Ya idatna ni' an amin nan pohdom,
ya iyabulutna ni' an amin nan ninomnommuh ma'at
5 ta it'u'min umamlong hinan pangabakam,
ya umanla amin mangipabagbagtun Apo Dios an dumalat di pangabakam.
Abuluton ni', Apo Dios, an amin nan odowom ay Hiya.
6 Ad ugwan ya inila' an hi Apo Dios ya halimunanan ibaliw nan alin pento'na,
ya hidih nan wadanad abuniyan ya donglonay luwalun nan pento'nan ali,
ya badangana hiyan amin hinan pi'gubatana an dumalat nan nidugah an abalinana.
7 Nan udumna ya mumpahiyadan ehdolda nan kalesadan mi'gubat,
ya nan udum goh ya ehdolda nan kabayuda,
mu hay ehdolmi ya nan abalinan Apo Dios an Diosmi!
8 At hanan tatagun mangehdol hinan umat hina ya umatdah nan nun'atu"in an mid ologdan tuma'dog,
mu da'mi ya gun ami bumi'ah.
9 Apo Dios, pangabakom ni' nan alimi,
ya badangan da'mih nan pumbaganmih badangmu!