8
Nan Anabagtun Apo Dios ya nan Abalinan di Tagua
Hete ya psalm an intudo' David, ya hay intud'ana ya nan ap'apun di muntudtuduh kanta, ya gittithb di style hi matukal.
1 Apo Dios an Apumi, nidugah di anabagbagtum an nundongol hi an amin an tataguh tun luta,c
at idaydayaw da'a ti mid nipaddungan nan anabagbagtum an ta"on hinad abuniyan!
2 Ya ta"on nan ung'ungungnga ya nan pa'ittungaw ya idaydayaw da'a gohd
ti pinogpogmu nan buhulmu an ngungumhay ay He"a.
3 Ya wa ay ta tangado' ad daya ta tigo' nan limmum
an nan bulan ya nan bittuan an inhinam hinan wadanda
4 ya manoh'aa' ti anaad ta pa'annomnomom ya pa'ipapto'om
nan tataguh tun luta an un mi'id di hulbida?e
5 Limmum dida an na'ampa ya un nan a'anghelmu,
ya indatmuy a'e'gonandaf
6 ti indatmuy biyangda ta diday okod an mangipapto' hinan numbino'ob'on an limmumg
7 an umat hinan kalnilu, ya baka, ya gandeng, ya nan udumnan a'animal,
8 ya nan hamuti, ya an amin nan numpunhituh nan danum an umat hinan ekan,
ya dolog, ya dalit, ya nan udumnan munhituh nan danum.
9 Apo Dios an Apumi, immannung an nidugah di anabagbagtum an nundongol
hi an amin hinan tataguh tun luta!