6
Luwaluh Pun'adawan hi Badang hinan Way Ligat
Hete ya psalm an intudo' David, ya hay intud'ana ya nan muntudtuduh kanta, ya mahapul an matukal nan instrumenton way gadengna, ya hay sheminitha di stylena.
1 Apo Dios, adia' ni' ihingal hi un'a bumungot,
ya adia' ni' goh moltaon hinan nidugah an bungotmu!
2 Ya unna' at ni' hom'on ay He"a ti ten lumungtuya',
at badangana' ta idatmuy bi'ah'u.
3 Ya ten nidugah di numanomnoma',
at anuud, Apu, di duminngana?
4 Umali'a ni', Apo Dios, ta baliwana'
an dumalat nan nidugah an pamhodmu
5 ti mi'id di munnomnom ya mundayaw ay He"a
hinan awadan di natoy.
6 Ya ten magugulua' an amahdomahdom ya lumugwalugwaa'
an mama'pot di pungan'uh lugwa'.
7 Ya adi umday pannig'u ti numpangalatunnu' di mata'
an dumalat nan limmugwalugwaa' hi pangat nan buhul'un ha"in.
8 At da'yun nun'appuhiy pangatna ya mun'akak ayu
ti dengngol Apo Dios nan kila'
9 ya nan pumpahmo'a' hi badangna,
at inabulutna!
10 At an amin ni' nan buhul'u ya nidugah di abainanda,
at mid papto'ananda ya numpangalayawda.