24
1 Ya intuluy Job an himmapit an inalinay,
“Anaad nin ta agguy intulag Apo Dios di algaw hi gutud di ahumalyaan?
Ya anaad ta un hohoddon nan tatagun nanginnilan Hiyay algaw hi a'atana,
at anuud mah nin?
2 Ti nan tatagun nun'abaholan ya akawonday luta
an pun'ipahligda nan mahon an niyammah nan igad ta dumamunay lutada,
ya akawonday animal di ibbada ta iddumdah animalda.
3 Ya polhonda nan dongkin di nguhu,
ya nun'alada nan bakan nan umu'utun an binabai ta patang nan inutangda.
4 Ya ibilangda nan nun'awotwot hi mi'id di hulbina,
ya pun'ipata'otda nan agogohgoh an tatagu,
at mapilitandan umuy mipo"oy.
5 At nan nun'awotwot ya mibilangdah umat hinan agguy na'amun animal
an hidih nan mapulun di panganapanah onona,
ya hidi goh di panganapanah ma'an hi pananudnah nan imbabaluyna.
6 Ya mapilitandan umuy me'eb'ebto' hinan payaw di udum
ta umuyda alan nan iniwangan nan numboto' hinan payaw di nun'abaholan ta way ononda.
7 Ya molo'dah nan amahdomahdom an mi'id ah lubungda,
ya mi'id goh di ulohdah mangipadolnat ay didah nan tungnin.
8 Ya wa ay ta madloh di udan ya ma'potda,
at mumpapanguydah nan liyang hinan duntug ta hiyay ihi'ugandah pun'abunganda.
9 Ya nan nun'abaholan ya alanda nan nguhun ungungan natoy hi amada ta pumbalinondah himbutda,
ya nan imbabaluy nan nun'awotwot ya alanda ta bayad di inutangda.
10 Nan nun'awotwot ya mapilitandan muntamuh payaw an mi'id ah lubungda ti mid atog di pangngalanda,
ya ta"on goh atog unda munhinaang ya gunda muntamu ti mi'id di pangngalandah ononda.
11 Manu ti mumpogpogohdah nan olibon miyammah lana,
mu adida tamtaman,
ya mangammadah bayah an greyp,
mu ma'uwawda.
12 Ya hidih nan babluy ya madngol di kilan nan mun'agadyuh an mun'atoy
ya nan kilan nan nun'ahugatan an mumpabadang,
mu adi damdama donglon Apo Dios di luwaluda.
13 Ya nan nun'abaholan an tatagu ya ngohoyondah Apo Dios,
ya adida ahan abuluton di itudtudunan mangipapatal hi nomnom,
ya adida aton nan pohdona.
14 Ya nan pumapatoy ya bumuhu' ta pumpatoyna nan nun'awotwot ya un mahkay tumalanu,
ya hinan lumabi ya umuy mangakaw.
15 Ya nan gun umilugtap ya hohoddonay ahdomanana ti alyonay,
Olom man ya mi'id ah mannig ay ha"in!
Ya hophopanay angahna ta mi'id ah mangimmatun ay hiya.
16 Ya wa ay ta mahdom ya punhogopday a'abung ta mangakawda,
mu wa ay ta nawa'ah ya immuyda nipo"oy an molo' ti adida pohdon di patal.
17 Hay pa'appohpohdonda ya nan munhehellong an bo'on hay mapatal
ti impa'enghada nan nun'appuhin ma'ma'at hinan munhehellong.
18 Mu mun'a'ubahdah tun lutan umatdah nan upag hinan danum,
ya nan lutada ya ma'idutan,
at hiyanan mi'id ah umuy an muntamuh nan galdenda.
19 Ya nan atoy di nangpuh hinan nun'abaholan
an umat hinan lumahun potang hinan tiyalgaw
an punnaudonan anangon nan immodhol an dalallu.
20 Ta"on un hi inada ya inaliwanda,
at amnawan nan begeh an mumpangan hi lamohda.
Umatdah nan nalngoh an ayiw an nun'a'ipung!
21 Ya manu ay umat hinay ma'at ay dida ti na"appuhiy gunda inat hinan binabain bahig
ti agguyda ahan hemmo' nan maligligat an umu'utun.
22 Mu nan nidugah di abalinan Apo Dios ya ubahona nan mun'abi'ah
an ta"on hi un nundongol di anahamadda
ti mun'atoydan amin nan gun mangat hi nappuhin adida ahan mi'tagu.
23 Olom ya iyabulut Apo Dios an mi'tagudah mi'id al'ali,
mu titiggonay ato'atonda.
24 Nan nappuhiy pangatda ya manu ti ag'agadan umadangyan,
mu un na'amtang di a'e'gonanda,
ya napogpog an umat hinan na'at an amin hinan tatagu
ti umatdah nan paguy an nakumpay ya nalyaw.
25 Undan way mangihaut an mangalih un nibahhaw?
Ya undan goh way nanamad hi un agguy immannung nan hinapit'u?”