19
Hay Nambal Job ay Bildad
1 Ya tembal Job an inalinay,
2 “Anuud nin di pangidinnganyun mangipaligat ay ha"in?
Ti ten unyu mamaon tun punholholtapa',
3 ya ten papulunad ugwan hi gunyu pamahapahalan ay ha"in!
Un ayu dan adi bumain enen gunyu aton?
4 Ta"on ahan un immannung an numbahola' mu mi'id di biyangyu ti ha"in di okod,
5 ya ta"on hi unyu alyon hi un ayu nabagbagtu ya un ha"in
ya imbilangyu tun punligligata' hi mangipa'innilan ha"in ya numbahola'
6 mu undan mi'id inilayun hi Apo Dios di nangat hi umat hitu?
Hiya ya paddungnay hinulua' ta pampapnan ha"in.
7 Ya nunlilia',
mu mi'id ah managgung an mangngol ay ha"in,
ya numpabadanga',
mu mi'id di mamadang ay ha"in an ta"on ah oha.
8 Hiya ya hinawananay dalano' ta mi'id di pange'wa',
ya impahelongnay dalano' ta adi mattig.
9 Ya inubahnan amin di inadangyan'u
ya din anabagtu' an pange'gonan nan tatagun ha"in.
10 Hiya ya pinaligata',
at nalipuh di odol'uh dogoh ta engganay unna' ubahon,
ya nan namnama' ya ay ayiw an nabu'nut, ya niwallang, at nalyaw.
11 Hiya ya nidugah di bungotnan ha"in,
ya imbilanga' hi nidugah an buhulna.
12 Ya hennagna nan tindaluna,
at nundadaanda ta gubatona' ya lini'ubday abung'u.
13 Ya hennagna nan a'agi' ta umadagwidan ha"in,
ya an amin din liligwa' hidin hopapna ya indinongdan mi'ligwa mahkay ay ha"in.
14 Ya tinaynana' hinan tutulang'u,
ya umat goh hinan liligwa'.
15 Ya din minangili' ya naliwana',
ya din baal'u ya hay pannigdan ha"in ya unna' ay bunag.
16 Ya unat goh mun'ayaga' hidin baal'u
ya adia' udot haghaggungon mahkay ad ugwan,
ya adia' ahan igohgohan.
17 Ya ta"on hi ahawa' ya adi pa"edpol hinan hunghung di hodohda',
ya an amin nan a'agi' ya din'uga' an binataanana'.
18 Ya ta"on nan ung'ungungnga ya pahiwona'
ti wa ay ta tigona' hi unna' meheggon ay dida ya abatlana'.
19 Ya an amin din nahamad an liligwa' ya din pohpohdo' ya din'uga'.
20 Ya ten na"ung'unga' ahan,
at mattig tun tungal'u,
ya un hi'ihi'itangan at matoya'.
21 At da'yun liligwa' ya hom'ona' ni'
ti manu ay ya unna' indatan ay Apo Dios hi ligat'u!
22 Ya anaad ta paligatona' ay da'yun umat hinan aton Apo Dios?
Un ayu dan adi humigan gun mangipaligat ay ha"in?
23 Maphod hi un waday mangitudo' hitun hapito' ta iyammadah liblu,
24 unu ihelheldah nan batu ta way atonan minaynayun ta adi ma'aliwan!
25 Hay inila' ya matattagu nan Baliw'u,
at hitun apogpogana ya umalih tun lutan mumpapto',
at Hiyay okod ay ha"in.
26 Ya ta"on unna' matoy ta mapitay tun odol'u
mu tigo' damdamah Apo Dios.
27 Immannung an hamado' an tigon hi Apo Dios,
ya umamlonga' ahan an mannig ay Hiya.
28 Mu ad ugwan ya numanomnom ayun liligwa' hi ipabaholyun ha"in,
ya ipaha'ityuy nomnom'u ti alyonyuy un hay bahol'uy dimmalat hitun ma'ma'at ay ha"in.
29 Mu nomnomonyun awni ta madatngan di algaw
at mahumalya ayun ne han aat di punnomnomyu
ta way panginnilaanyun waday munhumalyah tagu!”