16
Hay Nambal Job ay Eliphaz
1 Tembal Job an inalinay,
2 “Ha"in ya gun'u dengngol hanan hapit,
ya mi'id ah maphod hi umal'alu' an umipa'amlong ay ha"in!
3 Uya'a ya adi ayu duminong an humapihapit!
Ngadan di problemayu?
4 Ya gulat ta da'yuy mihukat ay ha"in an maligligatan
at abalina' goh an hapiton ay da'yu nan umat hinan inaliyu,
ya abalina' goh an hapiton di do'ol hi aatyu ya gunna' munwigwigiwig ay da'yu!
5 Mu ha"in ay ya adi umat hinay ato'
ti nan hapito' ya umal'alu' ay da'yu!
6 Mu gulat ta humapita' ya adi damdama ma'aan di dogoh'u,
ya gulat goh ta unna' didindinong
ya hihidya damdama tun holholtapo' an ligat'u.
7 O Apo Dios, anaad ta umat hituy inatmun ha"in an ten nidugah an paligligatona'
ya inubahmun amin din pamilya'?
8 Ya ten paddungnay hinawida' ay He"a,
ya te an mamattig ti ten na'ung'unga' an nun'iyamit di up'up'u,
at hiyay panginnilaan anuh unna' numbahol.
9 Ya nidugah ahan di bungot Apo Dios ay ha"in
an ay ihunay unna' pumbangwah ay Hiya
ti nan babana ya ay nun'ipato' hi lamoh'u,
ya nan buhul'u ya atata'ot di matadah unna' tigon.
10 Hinhannulona' ya inabohlana' hinan tatagu,
ya hin'umu'udduman inalulungana' ya tinapa'day apeng'u.
11 Ya ene'koda' ay Apo Dios hinan adi mangngol an tatagu,
ya indata' hinan tatagun mi'id di gohgohna.
12 Hidin hopapna ya mi'id di al'alin ha"in,
mu ginuluna ti enedon Apo Dios hi bagang'u,
ya nun'ihuplita',
ya ha"in di pento'nah panaon.
13 At pinananay numpinangngel hi odol'u
an mi'id ahan di homo'na ti nun'ibu'lay di putu'.
14 Ya unna ahan itugtugan mamaligat ay ha"in
ti un nonong ya hinugatana' an umat hi aton nan tindaluh nan buhulna.
15 At nunlubunga' hi langgut,
ya numpu'upu'a' hinan hupu' ta ipattig'uy punlungdayaa'.
16 Ya binumlah di mata' hi limmugwalugwaa',
at numpangalatunnu' tun mata',
at mattig an waday nappuhih na'at.
17 Ti ta"on un ha"in ya immannung an mi'id ah bahol'u,
ya nahamad nan luwalu' ay Apo Dios.
18 He"a ni' an luta ya adim ni' ahan aluban tun dala'
an hiyay mangipa'innila ay daten na'at ay ha"in!
19 Ya ta"on ad ugwan ya wah did abuniyan di mun'ihtigun ha"in
an Hiyay mangibaag hi aat'u.
20 Ya henen mun'alun di nahamad an ligwa'
ti donglonay luwalu' an ta"on hi unna' kumila.
21 Ya maphod ni' hi un waday ohah tagun mangihapit ay ha"in ay Apo Dios
an umat hi aton nan ohan taguh nan nahamad an ligwana an hiyay mangihapit.
22 Ti ten nahnot di tawon hi pi'tagua',
at dalano' nan dalan an miyuy hinan lugal an adi mabalin hi unna' goh mumbangngad.”