11
Hay Nahhun an Inalin Zophar ay Job
1 Hi Zophar an iNaamah ya himmapit an inalinay,
2 “Un mah ta"on un do'ol nan hinapitmu ya mi'id ah nambal?
Undan hay ado'ol di hapiton di taguy panginnilaan an mi'id di baholna?
3 Undan hay ninomnommu ya un mi'id di ologmin mambal hinan hapitom an mi'id upidna?
Ya undan mabalin an ipadinong da'mih nan pahal an panapitmu?
4 Inalim hi un nan makulug di unudom,
ya mi'id ah baholmun Apo Dios.
5 Mu hay nomnomo' ya maphod hi un humapit hi Apo Dios
ta tabolona nan ibagam
6 ta ipa'innilanan he"a nan do'ol an numbino'ob'on an aat di la'eng!
Do'ol man di agguy tu'u inila ya nan adi tu'u ma'awatan!
At innilaom an moltaon da'an Apo Dios,
mu nahnot di pummoltanan he"a ya un din na'alin moltam.
7 Undan udot ma'awatam nan agguy impa'innilan nan na'abbagbagtun Apu tu'un Dios?
Undan udot abalinam an manginnilan amin hi aatna?
8 Adi mabalin! Ti adi ma'awatan nan aat Apo Dios
an umat hi inadagwin tun luta ya ad abuniyan an adi malukud,
ya umat goh hi amaluhung tun lutan adi malukud.
Undan udot nipaddung di inilam hi inilan Apo Dios?
9 Ya ongol di anabagtun Apo Dios ya un tun luta,
ya ambilog ya un nan baybay.
10 Ya gulat ta ipadpap da'an Apo Dios ta iyuy da'ah nan punhumalyaan
ya undan udot waday way abalinanan mangipadinong ay Hiyah nan atona?
11 Ya i'innilanay aat nan mi'id di hulbidan tatagu,
ya ihamadna goh an tigon an amin di pumbaholanda.
12 Undan mabalin an ma'lum nan dongki ta tagu?
Umat hina goh an adi mabalin an manomnoman ya luma'eng nan tagun nakudang di nomnomna.
13 Gulat ta maphod di wadah nomnommu ya puhum
at munluwalu'an Apo Dios,
14 ya gulat ta itutuyum nan baholmu,
ya impogpogmun mangat hi nappuhi
15 at mabalin mahkay an adi'a bumain,
ya mahalimunan'a an mi'id di ita'otmu.
16 Ya aliwam an mapogpog nan holholtapom
an umat hinan datong an maluh hinan hiluk di langtay.
17 Ya ma"ap'aphod ahan ya un nan amaphod di tongan di algaw nan pi'taguam,
ya umat'ah nan helhelong an mi'id di al'ali.
18 At mi'id di al'alih nan pi'taguam,
ya wada mahkay di namnamam,
ya mabalin mahkay an halimunan da'an Apo Dios,
at pumhod di punle'nam,
ya mun'eblay'a mahkay.
19 Ya mi'id mahkay di tuma'tam hinan olo'am,
ya do'ol di umalin mumbagah badang ay he"a.
20 Mu nan nun'abaholan an tatagu ya mi'id di namnamadan mabaliwan,
an anggay di atoy hi namnamaonda.”