24
Nan Tamun Niwanah hinan Papadin Apo Dios
1 Nan na'uhig an himpampun an nalpuh nan holag Aaron:
Hay holag Aaron ya hi Nadab, ya hi Abihu, ya da Eleazar ay Ithamar. 2 Ya da Nadab ay Abihu ya natoyda an mi'id ah holagda, at da Eleazar ay Ithamar di nangitamun numpadi. 3 Ya da Zadoka an holag Eleazar ya hi Ahimelek an holag Ithamar ya bimmadangdan David ta ginodwagodwada nan holag Aaron ta impiyapongday tamuda. 4 Ya himpulu ta han onom di himpampun hi na'uhigan nan holag Eleazar, ya waluy himpampun hi na'uhigan nan holag Ithamar. Ya manu ay ma'at di umat hina ti do'do"olday a'ap'apuh nan holag Eleazar. 5 Ya hay inatdan nangidat hinan tamudan u'upihyal nan Timplun Apo Dios ya unda inyu'nuh ta nidat di tamun nan papadin holag da Eleazar ay Ithamar.
6 Ya unat goh nalpah hanan na'at ya intudo' Shemaiah an hina' Nathanel an holag Levi di ngadanda, ya heden gutud di nangitud'anda ya waday nangihtigu an nan ali, ya nan u'upihyal an da Zadok an padi, ya hi Ahimelek an hina' Abiathar, ya nan mangipangpanguluh nan hina"aman papadi, ya nan hina"aman holag Levi, ya ohay hina"amah na'alah nan holag Eleazar, ya oha goh hinan holag Ithamar.
7 Ya didatuy numbubunnutan hi tamudan duwampulu ta han opat di ahimpahimpampun an hina"ama:
Hay nahhun hi nabunut ya hi Jehoiarib,
ya miyadwah Jedaiah,
8 ya hay miyatlu ya hi Harim,
ya miyapat hi Seorim,
9 ya miyalemah Malkijah,
ya miyonom hi Mijamin,
10 ya miyapituh Hakkoz,
ya miyawaluh Abijah,b
11 ya miyahiyam hi Jeshua,
ya miyapuluh Shekaniah,
12 ya miyapulu ta ohah Eliashib,
ya miyapulu ta duwah Jakim,
13 ya miyapulu ta tuluh Huppah,
ya miyapulu ta opat hi Jeshebeab,
14 ya miyapulu ta lemah Bilgah,
ya miyapulu ta onom hi Immer,
15 ya miyapulu ta pituh Hezir,
ya miyapulu ta waluh Happizzez,
16 ya miyapulu ta hiyam hi Pethahiah,
ya miyaduwampuluh Jehezkel,
17 ya miyaduwampulu ta ohah Jakin,
ya miyaduwampulu ta duwah Gamul,
18 ya miyaduwampulu ta tuluh Delaiah,
ya miyaduwampulu ta opat hi Maaziah.
19 Ya nitudo' an amin hatun linala'in na'uhig di nidat hi tamudan hinohha ta wa ay ta humigupdah nan Timplu ya way ohaan atona nan nidat an tamuna ta miyunnud hidin inalin Aaron an ad holag ay dida, an umat hinan pangunudandah nan Uldin Apo Dios an dayawondan holag Israel.
Hay Nitud'an nan Udumnan Holag Levi
20 Didatuy udumnan mangipangpanguluh nan numpunhina"aman nalpuh nan holag Levi:
An mete"a ay Amram an nunholag ta hi Shubael, ya nunholag hi Shubael ta hi Jehdeiah.
21 Ya hi Ishiah ya nalpuh holag Rehabiah.
22 Ya hi Jahath ya nalpuh holag Shelomoth an nalpuh holag Izhar.
23 Ya nan holag Hebron an linala'i ya hi Jeriah di pangpangullu, ya hi Amariah di otob, ya miyatluh Jahaziel, ya miyapat hi Jekameam.
24 Ya hay lala'in holag Uzziel ya hi Micah, ya nunholag hi Micah ta hi Shamir. 25 Ya nan pogtang Micah an hi Isshiah ya nunholag ta hi Zechariah.
26 Ya hay linala'in holag Merari ya da Mahli ay Mushi. Ya nunholag hi Jaaziah ta hi Beno.
27 Ya nunholag hi Jaaziah an holag Merari ya da Beno, ya hi Shoham, ya da Zakkur ay Ibri.
28 Ya nunholag hi Mahli ta hi Eleazar an bahig an mi'id di holagna.
29 Ya nunholag hi Kish ta hi Jerahmeel.
30 Ya hay holag Mushi an linala'i ya hi Mahli, ya da Eder ay Jerimoth.
Didanay linala'in holag di a'apun Levi an miyunnud hinan napatad hi nahlagan nan hinohhan hina"ama.
31 Ya nan mumpangipangpanguluh nan hinohhan hina"ama ya nan udidian di ni'binnunut ta innalnay poto'dah tamun umat hidin inatnan tutulangdan din papadin nalpuh nan holag Aaron. Ya heden inatda ya teten'ol nan Alin hi David, ya hi Zadok, ya hi Ahimelek, ya din mumpangipangpanguluh nan numpunhina"ama an papadin holag Levi. Ya numpapaddung din inatdan binnunut an ta"on hi unda pangpangullu unu udidian.