II Samuel
1
Hay Nanginnilaan David hi Natayan Saul
(I Sam. 31:1-13; I Chron. 10:1-12)
1 Unat goh naluh di atnay algaw hidin natayan Saula ya numbangngad da David hi ad Ziklag an nalpudah nan nangabakandah nan holag Amalek. 2 Ya unat goh heden miyatlun algaw hi awadandad Ziklag ya wada han ungan lala'in dimmatong an nalpuh nan nungkampuan da Saul an nun'ahekhek di lubungna, ya hupuhupu' di uluna an mangipa'innilah un munlungdaya. Ya unat goh immatam hinan wadan David ya nunluung ta e'gonana hiya.
3 Ya inalin David ay hiyay, “Hay nalpuwam?”
Ya tembalnan inalinay, “Unna' limmayaw hinan nungkampuan nan holag Israel!”
4 Ya inalin David goh ay hiyay, “Undan way na'at? Ibaagmun ha"in.”
Ya tembalnan inalinay, “Na'abak nan holag Israel, at hiyanan numpangalayawda, ya do'ol di nun'atoy hinan tindalu, ya ta"on un da Saul an hin'ama ay Jonathan ya ni'yatoyda goh!”
5 Ya inalin David hinan lala'iy, “Hay nanginnilaam hi un immannung an natoy da Saul ya nan imbaluynan hi Jonathan?”
6 Ya inalin din lala'iy, “Manu ay inila' ti nipaddeh ya wah dia' hinan Duntug an Gilboa, ya tinnig'uh Saul an imbabayuhnah din gayangna, ya na'uy an umatam ay hiya din pi'buhulnan numpunlugan hidin kalesa ya din numpuntakay hinan kabayu! 7 Ya unat goh nungwingi ta tinniga' ya inayagana', ya inali' ay hiyay, Hay pohdom hi ato'? 8 Ya inalinan ha"in di, Hay ngadanmu? Mu inali' ay hiyay, Ha"in di holag Amalek. 9 Ya inalinan ha"in di, Aga ta patayona' ti ten magadyuh an matoya' damdama! 10 At pinatoy'u hiyab ti inila' an matoy hiya damdama an dumalat nan hugatna! Ya innal'u din koronah uluna ya din gumo' hi ta'laynan pangimmatunan ay hiya!”
11 Ya unat goh dengngol David ya din i'ibbana ya nunhekhekday lubungdah 12 kilada ta ipattigday punlungdayaanda, at nun'ulatda eden algaw an dumalat hinan natayan da Saul an hin'ama ay Jonathan, ya nan holag Israel an tatagun Apo Dios.
13 Ya hinanhanan David hidin nangulgud hidin na'at an inalinay, “Hay nalpuwam?”
Ya tembalnan inalinay, “Ha"in nongkay di ohan holag nan bunag an hi Amalek di apu' hidin penghana.”
14 Ya inalin David ay hiyay, “Anaad ta agguy'a timma'ot an namatoy hinan alin pento' Apo Dios? 15-16 He"ay ad bahol hi atayam ti nan nangalyam hi pinatoymu nan pento' Apo Dios an ali!” At inayagan David din ohah nan ibbana, ya inalinan hiyay, “Patayom heten tagu!”c At immuy, ya pinatoyna.
Nan Ebel David ay da Saul ay Jonathan
17 Hiyah te ebel David hi natayan da Saul an hin'ama ay Jonathan, 18 ya inalinay mahapul an mituduh nan tatagud Judah nan adi maphod an na'at. At nitudo' hinan Liblun Jashard an inalinay,
19 “Nan nabagtun ap'apu tu'un holag Israel ya pinatoydah nan bulud di babluy tu'u,
ya ta"on nan mun'a'ihi' an tindalu ya nun'atoyda!
20 Adiyu ipa'innilad Gath ya ad Ashkelon ta adi innilaon nan agguy nakugit an iPhilistia
ti wa ay ta innilaon nan binabaih di at mun'am'amlongda!
21 Ya adi ni' dumuldulnu ya umud'udan hinan Duntug an Gilboa ta mi'id tummol hi mihabal
ti hidiy nun'atayan nan mun'a'ihi' an mi'gubat an da Saul ya din titindaluna,
at adi mahkay malamlamuhan din hapiawna.
22 Ya wan hidin gun ni'gubatan da Saul ay Jonathan ya natuliddan ni'gubat
ti nala'eng hi Jonathan an pumana ya hi Saul an pumalang,
at hiyanan do'ol di pinatoydah nan buhulda!
23 Nomnomnomon tu'u din amatagun da Saul ay Jonathan an hin'ama ti nidugah di namhoddan ditu'u!
Hidin ataguda ya ta"on un hidin natayanda ya agguyda ahan nundu"ugan!
Ya nidugah an mungwilitda ya un nan agila,
ya mabi'bi'ahda goh ya un nan layon!
24 At da'yun binabain holag Israel ya lugwaanyu nan natayan Saul
ti linubungan da'yuh nan ma"aphod an mumbolah an lubung
ya ginina'uan da'yuh nan na'al'altian hi balitu'!
25 Mu anakkayah ahan din natayan din nun'atulid an tindaluh din gubat
ti ta"on un hi Jonathan ya niwallang di odolnah dih nan duntug!
26 Uminguhua' hidin ibba' an hi Jonathan ti nidugah di pamhod'un hiya!
Ya nidugah ahan din pamhodnan ha"in ya un nan pamhod di babai!
27 At nunhegla ahan di na'na'at hidin nun'atayan din mun'a'ihi' an tindalu,
at mid mahkay hulbin din almasda!”