5
Hay Kantan da Deborah ay Barak
1 Ya heden algaw ya nungkanta da Deborah ay Barak an imbaluy Abinoam an umat hituy ingkantada:
2 “Wa ay ta ipangpangulun nan a'ap'apun di tatagu
ta umunud nan ipapto'da at alyon tu'uy,
Madayaw hi Apo Dios!
3 Da'yun a'ali ya donglonyu,
ya ta"on un da'yun a'ap'apu ya donglonyu goh
ti ikantaa' hi Apo Dios an Dios nan i'Israel.
4 O Apo Dios, hidin nakakam hinan Duntug an Seir ya din nanaynam ad Edom
ya immalyog tun luta,
ya nahyong ad daya,
at immudan.
5 Ya immalyog ad Sinai hi hinagang Apo Dios an Dios nan holag Israel.
6 Ya hidin amatagun da Shamgara an hina' Anath ya hi Jael ya din tatagun numbaat
ya agguyda ene'wah nan kalata ti nan nalikaw an dalan nange'wanda.
7 Ya nahnot din tatagun bimmabluy ad Israel ti nuntataynanda
ta engganah din immalia' an hi Deborah
an paddungnay ha"in di hi inan nan holag Israel!
8 Ya hidin nundayawan nan holag Israel hinan udum an madayaw ya waday gubat hinan babluyda,
mu mi'id ah ohah nan napat di libun tindalun di holag Israel hi nattig an nangdon hi gayang unu hapiaw.
9 Ya umamlonga' hinan a'ap'apun mangipapto' hinan holag Israel
ya nan tatagun mamamhod an bumadang.
Mipabagtuh Apo Dios!
10 Ya da'yun numpuntakay hinan mumpaha' an dongkin inumbun hinan ap'ap an lalat
ya umat goh ay da'yun mundaldalan hinan way ayanyu
11 ya donglonyu nan tungog di do'ol an mungkantah nan wadan di obob
an ikantaday nangabakan Apo Dios ya nan tindalunan holag Israel!
Ya unat goh dengngol nan tataguy kantada at niddumdan didah pantaw di allup,
ya init'u'dan inaliday,
12 Ipangulum, Deborah, ipangulum!
Ipangulum ta mungkanta ayu! Ipangpangulum!
Ya he"a, Barak an hina' Abinoam, ya pun'ihi'almu ta ekakmu nan tatagun pundopapmu!
13 Ya inabulut nan tatagun nahamad di aatdah din nun'ayagan nan mangipangpangulun dida,
at nundadaanda an mi'gubat.
14 Nan udumnan dida ya nalpudad Ephraim hi awadan nan holag Amalek,
ya niyunud ay dida nan holag Benjamin.
Nan holag Makir di nangipangpangulun dida,
ya hay ap'apuda ya nan holag Zebulun.
15 Nan a'ap'apun nan holag Issachar ya nitnudda ay da Deborah ay Barak,
at immuydan amin hinan nundotal an babluy.
Mu nan holag Reuben ya un mid poto' di punnomnomandah unudonda.
16 Anaad nin ta agguyda tinaynan nan kalniluda?
Ti immannung an agguyda niddum,
at ing'ingaonda nan mumpahtul an mun'ayag hinan ipahtulda!
Ya mid poto' di punnomnoman nan holag Reuben,
at hiyanan mid poto' di atonda.
17 Nan holag Gilead ya nunhitudah nan dammang di Wangwang an Jordan hi appit di buhu'an di algaw,
ya nunnonong nan holag Dan hinan nunhituwanda tuwalih nan neheggon hinan way duma'alan di pupul.
Ya nan holag Asher ya nunhitudah nan pingit di baybay.
18 Mu nan holag da Zebulun ay Naphtali ya agguyda tina'tan di atayanda,
at immuydan ni'gubat.
19 Ya immuy nan a'alid Canaan hidid Taanach hidih nan neheggon hinan obob ad Megiddo,
ya ni'gubatda,
mu mi'id ahan ah hinamhamdah silver!
20 Ya ta"on nan bittuan ad daya
ya paddungnay ni'gubatdan Sisera ya nan tindaluna.
21 Ya nundatong nan Wangwang an Kishon,
at nun'iyanud an amin nan buhulda ti mabi'ah nan danum.
At hiyanan natulida' an umuy mi'gubat.
22 Ya nan kakabayun di buhulmi
ya gumanitu' di u'ubdah nan lutan lumayaw.
23 Ya inalin nan Anghel Apo Diosb di,
Ma'idutan nan tatagud Merozc an numpunhituh di
ti agguyda immalin bimmadang ay Apo Dios an nangubat hinan mun'abi'ah an tindalu!
24 Mawagahan ahan nan babain hi Jael an ahawan Heber an holag Ken
ya un nan udum an binabain wah nan abung an tulda!
25 Ti nun'adaw hi Sisera hi danum,
mu hay gatas di indatnan nittuh nan mapla'an an bahun ma"aphod.
26 Ya unnaat alan di pado' din tulda,
ya inodnan goh di agwanay mattilyu,
ya intumu'nah apeng Sisera din pado',
ya minattilyuna ta nunhawang.
27 At nilapeng hi Sisera,
ya natoy hinan way inayungan Jael.
28 Wah dih inan Sisera an mangidudungngaw hinan tawan di abungda
an mamannod hi umanamutan Sisera, ya inalinay,
Anaad nin ta ad ugwan ya madnoy ya adi umanamut hi Sisera an nunlugan hi kalesana?
Anaad tuwali ta ad ugwan ya mid madngol hi munggitu' hi u'ub nan kabayuna?
29 Ya tembal nan nanomnoman an babain baalnan inalinay,
Goh kan ya unmu gun ilupit an nangalih
30 mid mapto' ya unda mangan'anap hi hamhamonda ta way gogodwonda,
ya ah binabai ta hinohhonda unu hindudwon nan tindalu?
Ya nan naboldaan an nanginan gina'u ta way igina'un Sisera,
ya nan maphod di al'altin buung ta buung'un queen!
31 At da'min Barak ya alyonmiy,
Hay pa'appohpohdonmi, Apo Dios, ya an amin nan mi'bohhol ay He"a
ya mun'atoydan umat hinan na'at ay da Sisera!
Mu an amin nan mamhod ay He"a ya umatdah nan benang di algaw!”
Ya unat goh nalpah hana ya mi'id al'alih nan holag ta nangamung naluh di napat hi tawon.