15
Kantan da Moses hi Wadandah Baybay
1 Ya ingkantan da Moses ya nan holag Israel nan kantah nundayawdan Apo Dios an inalinay,
“Ikantaa' hi Apo Dios an Hiyay nabagbagtun me'gonan
ti nan kabayu ya nan numpuntakay ya nun'ipalnongna didah nan baybay!
2 Hi Apo Dios di nangidat hi bi'ah'u ya nan abalina',
at Hiyay ikantaa',
ya Hiya goh di namaliw ay ha"in,
ya Hiyay Dios an ipabagtu' ya dayawo' an dinayaw din o'ommod'u!
3 Hi Apo Dios di ngadan nan mangab'abak hinan gubat,
4 ya inubahna nan tindalu ya nan kalesan punluganan di alid Egypt hinan baybay,
ya ta"on nan nabagbagtun u'upihyal di tindalu ya nun'alnongdah nan Mumbolah an Baybay.a
5 Hene'nob nan maluhung an baybay dida,
at ayda batun numpunlonong hi bunolna.
6 Nan agwan an ngamaymu, Apo Dios,
ya nidugah di abalinanan mangam'ameh ti numpuhitmuy binuhulmu.
7 Dumalat nan nidugah an abalinam ya inabakmu nan binuhulmu.
Nan bungotmu ya ay apuy,
at gohbona dida an ay ulut.
8 Ya unmu hinodohdaan ya natob'a' nan danum hi baybay,
ya nida'lig hinan numpinangngel an ay gaub.
9 Ya alyon nan mi'buhul di,
Pudugo' ta ah'upa' dida,
ya hinamham'un amin nan gina'uda,
ya godwo' ta ala' nan pohdo',
ya nan hanggap'uy pamatoy'un dida!
10 Mu hinapudan Apo Dios nan baybay,
ya nun'he'nob nan atata'ot an danum nan i'Egypt hinan atata'ot an danum
an umat hi batun di bungwit an nunlonong.
11 Ya mid hinan udumnan dios di nipaddung ay He"a, Apo Dios, hinan aatmu!
Ti He"a ya anggay di ma"aphod di anahamadna,
ya He"ay mangat hinan umipanoh'a,
ya mata'tan'an dumalat nan anabagtum!
12 Ya unmu eneldong nan agwanmu,
ya inubah tun lutay binuhulmi.
13 Dumalat nan adi mapogpog an pamhodmu
ya impangulum nan binaliwam an tatagu,
ya hinalimunam ta inyuymu didah nan maphod an luta.
14 Ya unat goh dengngol nan tataguh nan abablubabluy ya womogwogdah ta'otda,
ya umat goh hinan iPhilistia.
15 Ya timma'otda goh nan a'ap'apud Edom,
ya womogwog nan mumpumpapto' hinan iMoab,
ya nan tatagud Canaan ya limmungtuydah ta'otda.
16 Ya nidugah di ta'otda,
at nun'ahemongda,
ya dumalat nan nidugah an abalinam, Apo Dios, an tinnigda
ya namolda an paddungnay umatdah batu
ta engganah un naluh nan tatagum an pento'mu.
17 Ta iyuymu didah nan duntug an idatmun dida ta banohda,
ya hidiy pangiyammaam hinan Timplu an punhituwam.
18 Immannung an hi Apo Dios di mun'alih mid pogpogna!”
Nan Kantan Miriam
19 Nan holag Israel ya linauhanda nan baybay an nan mamagay nange'wanda. Ya inunud nan u'upihyal an numpunlugan hinan kabayu ya nan udum an titindalu, mu nun'addumon Apo Dios nan danum, at nun'alnongda. 20 Ya nan babain propetan hi Miriam an agin Aaron ya innalna din tambourine ta impagangohna, ya nangunud an amin nan binabain numpangdon goh hi tambourine, ya nanayawda. 21 Ya ingkantaan Miriam didan inalinay,
“Ikantaanyuh Apo Dios
an Hiyay nabagbagtun me'gonan
ti nan kabayu ya nan numpuntakay
ya nun'ipalnongna didah nan baybay!”
Nan Mumpait an Danum
22 Ya impang'un goh Moses nan holag Israel ta tinaynanda nan Mumbolah an Baybay ta immuydah nan mapulun hi ad Shur.b Ya tuluy algaw di dimmanallanandah nan mapulun, ya mi'id ah inah'upandah danum. 23 Ya la'tot ya nidatongdad Marah,c mu adi mabalin an ma'inum nan danum hidi ti mumpait (at hiyanan nangadnan hi ad Marah). 24 At nan tatagu ya tayubtubandah Moses an alyonday, “Hay pangngalan tu'uh inumon mah?”
25 At init'u' Moses an nunluwalun numpabadang ay Apo Dios, ya intudun Apo Dios han penton ta ipa'wahnah nan obob, at numbalin heden danum hi maphod an ma'inum.
Ya hidid Marah di nangidatan Apo Dios hi uldin an mahapul hi unudonda, ya hidi goh di nanapngan Apo Dios ay didan 26 inalinay, “Donglonyu ay an nahamad nan hapito', ya atonyu nan maphod, ya unudonyu nan maphod an intugun'u at adi' da'yu moltaon hinan dogoh an umat hinan nummolta' hinan i'Egypt ti Ha"in hi Apo Dios an Mangiyadaog hinan Pundoghanyu.”d
27 Ya impadehda goh ta nangamung unda nidatong ad Elime hi wadan nan himpulu ta duwan obob, ya wada goh di palma an napituy puu, at hidiy immapalandah nan way neheggon hinan obob.